志偉恨拍AV版床戰金燕玲
前晚勇奪「最佳男配角」的曾志偉，在後台受訪時興奮得連跳五次影相，又不時錫錫獎座。其後，他與贏得女配角的金燕玲與余文樂出席慶功宴，志偉女兒曾寶儀亦有撐場，還作狀向爸爸獻吻！志偉表示得獎特別高興，笑言會埋單請客：「餐餐都係我埋單！由舊年慶祝我獲提名到金馬獎，再到我贏錢同金像獎，邊有停過？（好幸運？）施南生同我講我呢個獎最難攞，話我係人緣好。」他又對余文樂失落影帝感可惜，提到會否再拍金燕玲以助余文樂攞獎？志偉開玩笑指想將得獎電影拍成AV版，又投訴與金燕玲零親熱戲：「拍部AV版！（你想拍床戲？）咪就係！樂仔今次戲中同金燕玲有床上戲、出浴戲同擦身體戲，我同佢係夫妻就有名無分！」講到失落「新晉導演」與「最佳導演」獎的兒子曾國祥，志偉坦言美中不足：「佢拎埋我就興奮好多喇！但佢仲後生，我都開心嘅，當然佢拎埋就更加好啦。」
曾國祥遺憾父子有得失
至於曾國祥則與女友王敏奕出席電影《七月與安生》慶功宴，同場失落影后的周冬雨未有接受訪問，同片女星馬思純則於微博恭喜惠英紅奪得影后，又自言能與對方提名已是榮幸。講到失落獎項，曾國祥直言遺憾未能父子兵攞獎：「最失望唔係攞唔到，係冇得同老竇一齊攞。我本身對拎獎期望唔大，但佢拎咗之後，我就好想攞！因為同一屆拎係好特別嘅事。（佢安慰你？）佢成日睥住我！驚我唔開心，我係對住佢笑嘅，家姐（曾寶儀）都有安慰我。」問到王敏奕如何安慰男友，曾國祥插嘴：「佢喺側邊呵我！」王敏奕聞言面紅反駁：「冇啊！我淨係問佢OK唔OK！」
