溫碧霞拍新戲延續《幸運是我》精神
女星溫碧霞（Irene）前晚盛裝亮相金像獎典禮，與任達華力撐好友惠英紅三度封后！對於惠英紅在台上的得獎感言，Irene亦被感動得眼濕濕！她說：「紅姐做得好好，最欣賞佢化老妝演老人痴呆，發揮得好好。以一個好朋友角度去睇，呢次得獎對佢嚟講好有意義，因為係獻畀佢過咗世嘅媽媽，呢次套戲係藝術電影，唔係好商業，好多謝楊生（楊受成）願意去投資，關注老人問題喺社會上係好真實，我都好希望拍到類似電影。」
任達華讚好友「做得好」
而任達華直言一如他所料由惠英紅封后，他笑說：「事前已經話紅姐會拎獎，佢真係做得好好，而套戲令我好感動嘅其中一個地方係有新導演、有新思維，先可以帶出呢個社會題材問題。」
問到有否興趣拍社會題材電影？二人都表示有興趣，Irene透露正籌備類似的新戲：「嚟緊會拍以調景嶺為背景嘅電影，自小喺調景嶺成長，呢個地方背景比較複雜，有逃難軍人等各樣人嚟到呢個地方，有好多屬於佢哋嘅故事。」她續說：「今次由自己嘅工作室拍呢套戲，投資之餘仲有份參演，初步構思，主角由五歲講到十幾歲，再由十幾歲到現階段，分兩段時間去寫，當中會用自己一啲真實故事同創作。楊生（楊受成）聽到故事都畀咗好大鼓勵，仲係咁催我開呢套戲，上次工作室拍《愛在深秋》時係籌備階段比較倉卒，今次唔會再為追時間拍戲，希望樣樣都做到足。初步已與新導演陳志發達成初步合作協議，應該會採用呢位新導演操刀拍戲，情況同《幸運是我》相似，老闆都舉腳支持。」