苟芸慧Plan明年結婚
藝人苟芸慧與前主播方健儀昨日出席時裝品牌Marella TropicOOZ慈善義賣活動，提到苟芸慧的好友王君馨將脫離單身行列，問到何時輪到她？她笑言待身邊的姊妹全部嫁人才到自己：「我另外仲有個姊妹2018年嫁，應該係最後一個。（即係你下年結婚？）努力Plan吓！」問到君馨的婚禮何時舉行？苟姑娘初時表示夏天，繼而透露將在熱帶國家舉行：「唔係好遠，近近哋，陽光與海灘咪夏天嘅地方。（君馨話唔畀姊妹性感？）新娘話點就點，畀咩衫就着咩！」
苟姑娘透露原本想設計一套珠寶送給君馨，但恐怕時間不足而打消念頭。至於會否帶緋聞男友賽車手陸漢洋一齊參加君馨婚禮？她說：「好似冇請佢，問吓新娘先。（未融入你朋友圈？）君馨好忙成日要拍劇，所以我幫到就會盡量幫佢手，呢排要為姊妹裙度身。」
至於方健儀則提到早前與母親為5月開台的奇妙電視拍攝節目《帶阿媽去旅行2017》，她說：「呢個係頭炮節目。（收到酬勞未？）即日畀到，同有線合作過幾次都係即刻出糧。」