城城揸辣跑唔夠推BB車過癮

中港婚姻近年係社會熱話，個個針對方媛嚟自內地嘅背景，猛話城城係「國貨城」，城城夠同日本性感女神藤原紀香、來自法國嘅名模Amanda S.、加拿大出生嘅鍾麗緹、本地薑嘅姚正菁同朱茵等傳過緋聞或拍拖啦，唔通又話城城係「日本城」、「法國城」、「楓葉城」同「香港城」咩？情場出征多年，唔腳仔軟o架？追求、拍拖、分手三部曲重複又重複，三年又三年咁循環，舞台王者如城城精壯毅力無限，始終都係人，會攰o架！每次城城就係唔想磨爛席，情願唔啱就洗牌分手再嚟過，今次正式封盤，證明佢一直以嚟唔係唔想結婚，而係要睇同邊個結！雖然佢成日話自己冇夫妻宮啫，但眼見身邊嘅老友好似張智霖同沈嘉偉個個結婚生小朋友，打邊爐時不斷加雙筷，舉目滿枱老友都拖男帶女，成日都愛回家，自己仲係一條冷條條揈，就算買晒啲辣跑戰車又點？都未必夠同老婆仔女齊齊坐七人車或推吓BB車過癮嘛？

出得廳堂 上得大床

唔少網民話方媛貪錢先嫁，叫城城小心第時畀人分身家，其實城城閱女無數，唔通真係只貪方媛樣靚身材正？做得天王都一定有咁上下轉數，冇理由笨到去娶一個明知吼住自己副身家嘅女人啩？況且娶個靚老婆返嚟，係咪一天光晒？我Nuts哥有唔少老友真係娶咗個靚老婆返嚟，你以為佢真係覺得好威呀？查實有苦自己知！叫老婆洗隻碗，佢話刮花指甲唔洗喎！叫佢幫手掃地執屋啦，又話整粗佢對手，都唔使再問點解就嚟冇廁紙用，但成屋都係化妝品同手袋啦！啲老友仲講笑話，將來年紀大機器壞，出入要推輪椅餵食飯或要插尿袋嗰時，唔知個靚老婆會唔會話驚刮花指甲而唔肯做呢？天仙咁靚，身材超特Cup再奉送長腿蛇腰又如何，齋睇個靚樣，係可以睇一世，但係男人更加明嘅係，唔通可以舉一世咩？出得廳堂，上得大床，好睇唔好用，就嘥氣啦！實用性先係重要，所以有好多美女群下之臣無數，埋門一腳都係結唔成婚，就係咁解囉！我反而覺得方媛夠勇，百分百好似葉蒨文首《瀟灑走一回》咁唱：「我拿青春賭明天，你用真情換此生。」方媛點會冇諗過，依家先至29歲，廿年後即49歲，城城已經71歲，夠晒資格攞生果金同長者醫療券嘅同時，更加需要佢嘅貼身照顧。

行大運 執好籌

身為第十四位「城女郎」嘅方媛，唔似十三號熊黛林咁攻城七年有名無實，唔使兩年貨仔成功食尾胡標尾會，你可以話係timing啱，城城已經去到呢個年紀，多得前人鋪橋搭路，無論身邊係方媛定鍾媛都會結婚，之但係方媛都要有把炮。城城經理人小美讚佢斯文同硬淨，即係外柔內剛啦！同城城拍拖，好似同全世界拍拖咁，做緊乜或做過乜，都要承受外間嘅評頭品足，幾難聽嘅說話都有，唔通愛就大晒咩？都要有耐力定力去忍！再聽埋城城曾經公開表揚方媛「善解人意」、「好乖」、「關心我健康」，就係咁簡單，足以令佢呢位情場浪子身心康泰，俯首稱臣。所以個個話方媛行大運執到城城呢支好籌，其實愛情係咪好似玩老虎機咁一定要靠運氣先中Jackpot？就算個天畀你遇到個天王甚至超級富豪，唔代表寫包單幸福一世，關鍵係你都要付出，先可以一直走下去。

Nuts哥