無綫咪神朱智賢爆遭胞兄家暴恐嚇

無綫藝人朱智賢去年憑索爆身材成功升呢被封「新咪神」，在綜藝節目《千奇百趣特工隊》中表現活潑生鬼，但原來對人歡笑背人愁，昨日她上載一張自拍照上網，相片沒有拍到眼睛，只見鼻子通紅似剛哭過。

Ashley發長文抒發感受，表示自小已被胞兄家暴：「有個咁嘅阿哥真係家門不幸，由細到大成日畀佢打，拳拳到肉，細個咩都唔識，淨係識喊，到大個咗，睇住佢問候阿媽祖宗18代，不知幾想鬧番佢轉頭，不過唔想多管閒事……啲人成日話父母有責任，我覺得佢已經35歲人係成年人，已為人父都唔識做人真係好悲哀，好多時我忍讓係因為唔想爸爸難過，但唔代表我會忍一世。最後我想講，我真係好傷心有個咁嘅阿哥。」大批網民都表示擔心，並留言安慰Ashley！

暫寄居朋友家

其後Ashley接受本報訪問，直言最近被胞兄恐嚇，令她驚到失眠：「因為屋企好小嘅事佢就發晒癲恐嚇我，佢以為好似細個咁，好多嘢都可以用暴力解決，暫時爸爸同佢傾緊，我自己就去咗朋友屋企住先，我同佢關係不嬲都好生疏，佢已經唔喺屋企住多過10年，不過佢有鎖匙開到門，我驚佢唔知會做啲咩，所以去咗朋友度！（佢有冇打你？有冇受傷？）今次冇受傷。（會否考慮報警或搵社工？）等爸爸處理咗先，我個人覺得佢係需要睇醫生，學吓情緒管理。」

朱智賢由細被胞兄打到大，一直啞忍淨係識喊。	朱智賢上載鼻子通紅自拍照，自爆遭兄長恐嚇。	歐陽巧瑩擔心朱智賢的情緒。

陳婉衡聽過訴苦

Ashley幾位圈中好友都表示擔心，指她平日甚少談及家事，歐陽巧瑩說：「家家有本難唸的經，我唔會主動八卦，但希望佢會搵我哋傾吓，好擔心佢！仲要佢都多病痛，怕佢屈住有更多壓力，希望佢堅強。」去年底與Ashley到廣西天坑拍節目的陳婉衡說：「同佢拍節目都聽過佢講，當時以為係細個兄弟姊妹打吓交嗰種，我認識嘅Ashley好樂觀、正面，希望佢快啲解決屋企事。」簡淑兒說：「都係啱啱先知，我有發訊息慰問佢，畀佢知道有人支持佢。」

文：影視組