馮盈盈抓劇拍賣身10年都制
港姐冠軍馮盈盈尚有數月便卸任，有指她拒簽10年長約而頓失力捧機會。昨日她出席公開活動時自恃青春無敵，當眾向無綫落嘴頭，揚言只要有機會便甘願「被綁」！
盈盈昨日與好姊妹陳雅思、何佩珉、藝人翟威廉、張振朗及謝東閔等，到鑽石山宣傳明珠台美劇《逃Prison Break》新一季首播，身穿短褲仔的她，玩遊戲時不經意大晒白滑長腿，健康又性感！對於被指因拒簽10年長約而失去受力捧機會，盈盈澄清：「真係冇呢個Offer，冇咁嘅事。（10年好長？）年期長唔長好主觀，我年紀唔算大，總之（合約）公司應該處理緊。」她承認卸任後有興趣在娛樂圈發展：「會全力去做，唔會三分鐘熱度。（最要考慮嘅條件係咩？）機會囉！想多元化發展，好似拍吓劇咁。（係咪公司應承就肯簽？）係。」
至於陳雅思亦透露正在傾合約：「我參選都係想換機會入行，不過簽約年期真係敏感嘅，希望大家明白。（都係機會行先？）係，不過我好好彩，公司畀咗好多機會我，呢排仲同黎耀祥等有節目推出。」
翟威廉日本引人笑
而翟威廉近日被翻「舊帳」，18歲時在日本以搞笑團隊隊員身份出道的片段在網上熱炒，他笑說：「當時我喺日本讀緊書，以兼職模特兒身份簽咗公司，佢哋安排我拍節目。我話明自己講日文有口音，佢哋唔介意，我喺節目內講廣東話，啲日本人好鍾意『冇問題』3個字，聽到就會笑。（有人搵你拍AV？）冇呀！（識咗日本女友？）試過一次，算初戀，佢依家結咗婚，大家有保持聯絡，我仲會寄禮物畀佢嘅小朋友添！」
文：影視組