何雁詩鄭俊弘拍拖斷正
歌手何雁詩（Stephanie）去年與日韓混血兒男友分手後一直恨拍拖，原來最近與合作無間的鄭俊弘（Fred）暗撻，據悉兩人去年出埠拍攝旅遊節目，朝夕相對下擦出愛火，Fred更不時於女友的大埔香閨過夜。前日二人又出動拍拖，期間好事被撞破，問到二人是否拍拖？Stephanie含春甜笑默認：「你哋覺得係咪係囉！」
Stephanie去年八月表示與日韓混血兒男友Wataru分手，但不足兩個月，她與Fred於十月一同出埠拍攝無綫節目《這個冬天不太冷》，日對夜對下擦出愛火。早前二人合拍劇集《我瞞結婚了》主題曲《真心真意》MV，亦當着工作人員面前打情罵俏，愛得極為高調。據悉相戀短短數月的兩人打得火熱，Fred不時到女友香閨度春宵，更試過太嘈吵而被鄰居投訴。
自稱有病照抽煙
早前表示身體不適辭演無綫劇《誇世代》的Stephanie，原本正於橫店拍攝另一劇集《天命》，但愛得癡纏的她近日秘密回港偷會男友。前日下午二時許，Fred駕駛其銀色座駕接載女友返回大埔寓所，見自稱身體不適的Stephanie一直於車內吞雲吐霧吸電子煙。兩人於家中短敍四個多小時，至六時許才見二人驅車離開，今次則由Stephanie駕駛其白色座駕載男友去林村。溫馨過後，Fred下車時明顯一臉倦容兼眼腫腫，期間二人於路邊談情，Stephanie甜笑以手指篤男友胸膛。當女友又再抽煙，Fred即擰歪面避吸二手煙。
未幾賴慰玲前來會合二人，三人齊齊步往友人於村內的cafe，Stephanie與Fred於門外撐枱腳歎茶，但當發現記者，他們即急急返回室內，至晚上七時許三人才步出，見記者拍照即時彈開。有備而來的Fred更不敢坐女友座駕離開，Call定租車於村口等待。
問二人是否拍拖？Stephanie含情脈脈望實男友，雙雙支吾以對，但未有否認戀情。Stephanie風騷地說：「畀啲時間我哋諗吓點答先。（點解同Fred同車嚟又分開車走？）你哋又知？（Fred由你屋企出嚟喎！）佢要去做嘢嘛。」再追問與Fred是否拍拖時，她一臉含春甜笑說：「你哋覺得係咪係囉！唔係咪唔係囉！」說罷便匆匆驅車離開。
不避嫌讚好男仔
Stephanie事後接受電話訪問，對於Fred車她回家，她說：「其實我飲醉酒，佢車我返屋企都好正常。（Fred成日去你香閨？）佢上過嚟我屋企幾次。（係咪拍拖？）總之好朋友啦，唔好成日問感情事，令到我哋好大壓力。（覺得Fred個人點？）佢梗係一個好男仔啦，我最鍾意唱歌好聽嘅男仔，我以前拍拖都會認，依家就留番啲空間。你打畀Fred問佢啦，同佢都可能有發展機會，將來嘅嘢冇人知。（到咗拖手同kiss嘅階段？）上次拍MV就有拖，都差啲kiss。（你媽咪見過Fred？）有次佢上嚟我屋企，但太夜媽咪瞓咗，但有次媽咪探我班都見過佢。」而Fred至截稿前未回覆。
文、攝：追蹤組