蔡瀚億親熱一Take過錢小豪鬧嘥料

藝人錢小豪與蔡瀚億（BabyJohn）在新片《救殭清道夫》中化身師徒合力打低殭屍王，兩人戲內打到飛起，戲外碰面後一見現場有足球機即較勁一番，認真大唔透！武打初哥BabyJohn「攞正牌」向「師傅」小豪免費學武，打到上癮的他自爆每場動作戲都必定重複練習不下十次，豈料仍被小豪投訴「唔夠認真」，何解呢？

投訴冇艷福唔公平

原來小豪笑指名草有主的BabyJohn雖然勤練動作戲，但往往與性感女神林明禎上演親熱戲時卻怕醜只敢一Take過，從不敢嗌NG！小豪乘機投訴自己一場情慾戲都冇：「佢成日重複練招，拍完動作戲又嗌嚟多幾次，但一拍親熱戲就一Take過！其實我同佢一樣，成日拍完都想嚟多次，但唔係拍打戲同文戲，而係情慾戲！我好認真對待o架，佢就唔認真喇！最慘今次仲冇我份，唔公平！如果有續集，愛情戲畀晒我啦，佢就出去負責打！」

蔡瀚億「免費」跟錢小豪學武，即席過招搞笑居多。	放大圖片	林明禎咁靚女，唔怪得小豪鬧蔡瀚億唔NG嘥晒！

不過，小豪不忘盛讚BabyJohn有學武天分，但對方亦不時於片場鬧出笑話：「佢好勤力又有天分，拍打戲都順暢，但有時就『自我感覺良好』！」BabyJohn聞言自嘲只有「三腳貓功夫」：「有幕跳起踩牆嘅戲份，拍完以為自己好型，睇番Playback見到自己好似隻雞仔起飛腳咁咋！」

文：影視組

場地：香港九龍貝爾特酒店

蔡瀚億

髮型及化妝：Wing Wong@The Attic Hong Kong、Jessica Chan@JessicaChan Makeup

服裝：CLUB MONACO