李怡野人本色 拳打舅父林海峰

李怡花名野人，由來有段古：「我個名李怡係有怡情養性嘅意思，但我細個係忟憎BB，又好遲先識講嘢，加上頭髮向上生，淨係識得嗌，同埋成日拎住公公支拐杖，所以屋企人就叫我做野人！」野人長於演藝世家，母親林珊珊在娛樂圈無人不曉，舅父是林海峰和林曉峰，一家人感情很好，她說：「我細個係舅父仔（林曉峰）湊我，林海峰成日整蠱我，試過我一拳打過去，佢將我個拳頭成個放入口，搞到我以為個拳頭畀佢食咗喺度喊，哈哈！我同媽咪好Close，好多話題，工作上會請教佢，能量治療都係佢鼓勵我學，佢叫我唔使擔心屋企負擔，媽咪身體好好，行得走得，係工作狂。」

能量治療提升情緒

野人數年前開始學能量治療，現時有執業資格，其中一個渠道是教瑜伽。她說凡有生命的地方就會有能量場，要學習低落時如何將情緒提升，瑜伽能有助平靜心靈，是個很好的治療渠道，她同時擁瑜伽導師牌開班教授：「2014年開始學能量治療，當時半信半疑，但學咗之後好多朋友話我成個氣場唔同晒，連講嘢都唔同，我又想增值自己，所以學到依家。」她認為人應該要增值自己，活到老學到老，希望可以學習母親處事的器量、林海峰的黑色幽默、林曉峰的敏捷反應，以及外公的豁達！

林海峰	野人認為要增值自己，活到老學到老。	野人示範瑜伽，表示瑜伽有助平靜心靈。

撐崔建邦唔花心

她為人所熟悉的還有與藝人崔建邦的戀情，她視男友為靈魂伴侶，並澄清不實報道：「佢個人心地好好，大家誤解咗佢（花心），佢依家好健康，做好多運動。（話你係第三者？）都係誤解，有太多傳言。細個受父母離婚影響，曾經對婚姻冇信心，兩個人一齊係緣分，總之溝通最重要，緣分要嚟擋都擋唔到。」

文：Ada Lam

攝：張福宏

場地：Lemondrop