曾國猷盡得志偉真傳好Cute搞笑
潮興Carpool Karaoke（車上唱K），不少國際巨星甚至連美國百變天后Lady GaGa亦在車上一展歌喉。最近曾志偉細仔曾國猷（猷猷）與無綫女主持梁芷珮（Christy）在社交網上開設頻道大唱經典歌，上載第一段片已吸引逾五萬人觀看，Christy讚猷猷渾身是戲，盡得爸爸的搞笑真傳。
猷猷與Christy的老公Ken是由細玩到大的好兄弟，可算是對方與Christy的媒人，Christy表示只要他們三個一齊便有無限笑彈。提到猷猷的Carpool Karaoke片段放上網後大受歡迎，Christy指只是無心插柳：「我哋十幾年前已經成日諗啲嘢玩，我覺得猷猷唱歌幾好聽，同埋佢扮呢啲樣係好乞人憎嘅！最近好興喺架車入面唱嘛，我有諗過喺其他地方，但係我覺得喺架車係最正！嗰日我哋揸車去學友演唱會，順帶就唱埋！」一直坐在旁邊笑笑口的猷猷則怕醜地說：「我唱歌唔係好好聽，但會成日喺屋企唱，尤其係我偶像學友嘅歌。」
唱學友歌 開心Share
經記者幾番邀請，猷猷才即席獻唱幾句張學友的《頭髮亂了》，果然有板有眼！演出經驗豐富的Christy被問到會否教一、兩招給猷猷，她竟說：「梗係唔使！佢嘅Gene（基因）咁勁，成身都係戲！唔係講笑，佢求其擺個樣已經好搞笑，我媽咪都讚佢得意！」猷猷忍不住說：「三十多歲仲話得意？不是吧！」說罷即擺出趣怪表情：「我真係好得意咩？」
講到將來發展，Christy與猷猷異口同聲地說：「我哋期待任何方式嘅合作模式，最緊要將開心分享出去，做嘢最緊要開心、好玩，好似我哋每次拍片都係玩，我哋覺得只要自己玩得開心，睇我哋片嘅人都會跟住笑出嚟，呢樣係我哋最想做嘅嘢。」
文：專案組
攝：吳文聰