蔡和平「百搭王」正能量叉甸
不少人選擇退休過悠閒生活，亦有人選擇繼續工作，被喻為「EYT之父」的資深製作人蔡和平屬於後者，最近他有意將香港長壽節目《歡樂今宵》帶到緬甸，希望在當地發放正能量！此外，他近年涉獵飲食業，點心、燒鵝、麵包甚至鹹鴨蛋，樣樣皆能，單單點心店已在亞洲開達四十多間，堪稱飲食界「百搭王」，相當有計！
資深製作人蔡和平曾製作香港最長壽節目《歡樂今宵》，當年除了何守信及沈殿霞等台柱外，不少紅星如吳君如及曾志偉等都曾參與其中，節目於1967年首播至1994年結束，足足播了廿七年，深受觀眾歡迎。而近年蔡和平有意把這個香港膾炙人口、不時發放正能量的節目帶到緬甸！
早前，蔡和平於其位於加多利山之豪宅內接受獨家專訪，透露這個節目計劃：「緬甸電視台想我過去搞一個節目，希望係健康、正能量嘅，因為當地有啲電視節目都好低俗，佢哋想搵一啲正面嘅節目，令到個社會風氣好一啲，《歡樂今宵》係好啱！（物色主持未？）我搵到一位喺緬甸好紅嘅藝人Zarganar，佢好適合做呢個節目。」
飲食業大展拳腳
除了搞電視節目，蔡和平三年前進軍飲食業，投資發展項目多樣化，有點心、燒味、法國麵包，甚至乎鹹蛋，稱得上飲食界「百搭王」！而進軍飲食業的第一個任務是把香港「添好運」點心店帶到新加坡，之後更殺出亞洲各地，經過三年多的努力，該店已經在東南亞開了四十多間分店，成績相當之好！
除點心店外，蔡和平去年底與鏞記燒鵝老闆之子甘崇軒於新加坡搞了一間「金牌燒鵝」；至於法國麵包店則在香港已開到第三間，開業三年堅持質量，一定要用法國水造包。而最近則搞鹹蛋皮蛋生意，他說：「呢啲蛋係供應畀中環星級食府嘅，喺廣東養，用嘅飼料全部都係好有營養嘅食物，啲鴨食得好，生出嚟嘅蛋當然非常之靚，而我哋醃製嘅皮蛋、鹹蛋仲會用古法，皮蛋醃製期45日，鹹蛋則25日，唔會好似一啲蛋商加啲催化劑令隻蛋一星期時間就製成皮蛋、鹹蛋，好唔健康。」71歲的蔡和平，做生意依然有心有力，愈搞愈多瓣，問他可有定下退休時間表？他笑說：「我好喜歡工作，唔會退休嘞！」
文：影視組