廖子妤簡淑兒公仔佔領梳化床
女孩子都愛儲公仔，藝人廖子妤（Fish）及簡淑兒也不例外，Fish自爆是「公仔癡」，家中梳化都被公仔霸佔，將來定會保存結婚的花車公仔；而Jessica的睡床也被公仔霸了一半，認真瘋狂！
昨日Fish和簡淑兒一同出席「東港城 x Bunny King夢幻世界」活動，獲新鴻基地產代理有限公司租務部總經理鍾秀蓮送贈公仔，她們又即場製作巨型Bunny King復活節卡。Fish透露很喜歡儲公仔，已被家人勸喻不要再買，她笑說：「我屋企張梳化唔係我坐，係公仔坐嘅，我最大年紀嘅公仔係24歲，係媽咪細個買畀我，每一隻公仔對我嚟講都係朋友，我會幫佢哋改名，又會同佢哋傾偈。不過細個媽咪發脾氣會掟我啲公仔，所以我有啲公仔係冇眼冇鼻，我唔會掟佢哋發洩，但會捏佢哋，哈哈！」記者笑問若將來男友求婚是否用一隻公仔就會應承？她即說：「唔好咁對我啦，不過第時結婚架花車上嘅公仔，我一定會保留，因為好有意義！」此外，談到有份提名金像獎最佳新演員的拍檔余香凝車禍傷勢，她表示對方康復進度良好，應該可以出席頒獎禮，又爆對方很想參與，因為新人獎一生人只有一次。
箍牙瘦咗冇整容
至於簡淑兒就表示粉絲們送很多公仔給她，睡房的單人床已有一半被公仔佔據。她又透露即將開拍電視劇《大帥哥》，與洪永城有很多對手戲：「因為我係暗戀佢，但佢唔騷我。（佢好惹緋聞喎？）佢都惹過、傳過晒啦，應該OK嘅。」對於被網民指愈來愈漂亮惹整容疑雲，她即說：「都好嘅，其實我瘦咗好多，同埋有箍過牙，不過冇同人講，唔想大家太關注呢樣嘢。我真係冇整過，講過好多次，希望大家信我啦！（學Angelababy搵醫生證明？）如果啲人質疑一樣嘢我就去澄清，咁樣唔會完。」她希望觀眾留意她的演技多於花邊新聞。
文：名人組