Amanda S.認婚姻失敗再嫁拖住先
混血名模Amanda S.前晚偕外籍男友出席活動，正式公開戀情，在男友身邊的Amanda尤如小鳥依人，兩人sweet到爆，但對於再婚與否，Amanda坦言第一段婚姻好失敗，要諗清楚才再婚。
Amanda S.於2014年與意大利籍前夫Christian Cappelli離婚，事隔三年走出離婚陰影的她，前晚終於大方與外籍男友Sam出席公開活動，兩人更企定定合照，拍照後還默契十足地嘴對嘴錫了一啖，人前人後相當甜蜜。Amanda大方介紹男友時，直言這是拍拖兩年多以來首次公開戀情，她說：「佢叫Sam，同我一樣係混血兒，有一半印度、四分之一新加坡和四分之一葡萄牙血統，佢喺英國長大，依家長住香港，做首飾和鞋生意。」
不再前後腳
她表示與男友感情穩定，問到是否準備結婚？她說：「唔知會唔會再婚，第一次婚姻好失敗，好心痛，睇吓啦！如果再婚都會有少少緊張。（男友有冇同你傾將來？）我哋相處得好開心，有傾過將來，maybe。（求咗婚未？）都冇戒指，自己離咗婚3年，要啲時間。（對佢有冇信心？）Of course，佢同呢個活動嘅老闆係好朋友，如果冇信心，就唔會一齊出嚟，以往去活動都係佢行先，我幾分鐘後先到，今日係第一次咁公開。」她重提年前她與男友出席楊其龍BB滿月宴被攝入鏡時，男友感到驚慌，問到男友現在不再驚驚？她說：「佢都流緊汗，唔慣，始終唔係娛樂圈。」
張孝全最愛偷拍
同場還有台灣男星張孝全及名媛羅君兒，張孝全透露是次來港看藝術展，因時間不足，希望下次再來，又透露讀書時主修美術，但最愛是攝影，自言不時在片場偷拍藝人的他說：「喺片場會拍到演員真實一面。（做電影攝影師？）18歲就有呢個想法，但到依家都未成事。」穿4吋高跟鞋到場的羅君兒，行路卻一拐一拐，她表示早前不慎整傷腳。
文：名人組