讚關淑怡有實力多歌迷撐 譚詠麟：佢要的起心肝
關淑怡最近又惹上麻煩，相識多年的譚詠麟寄語對方要學懂自己去面對，直指對方不肯打開多年來的心結，想法也鑽牛角尖。而他眼中的關淑怡是一位有實力的歌手，既有很多經典作品，也有不少歌迷，只要她肯努力去唱，將來還是有大把機會。
樂壇校長譚詠麟（阿倫）跟關淑怡（Shirley）由寶麗金年代已是同門歌手，阿倫前晚出席活動，對於Shirley上星期在其入住的酒店與餐廳職員爭執，事後涉嫌刑事恐嚇及普通襲擊被捕一事，阿倫坦言未有聯絡對方，他一臉嚴肅說：「冇冇冇，我冇佢電話，畀啲時間佢諗清楚想點。」
珠江三角洲多財路
對於有傳Shirley財困，阿倫說：「珠江三角洲咁多人聽廣東歌，對佢嘅歌咁熟悉，佢自己諗清楚。」Shirley擁有很多經典歌曲，阿倫語重心長說：「佢啲歌咁有實力，有咁多歌迷，珠江三角洲有過億人聽廣東歌，佢要的起心肝，我唔知佢有咩心結，唔知佢有乜嘢咁諗唔開。」
「志偉係佢老竇」
當年Shirley未婚產子，曾志偉曾被傳是小孩爸爸，盛傳今次亦有人找志偉出手幫忙？阿倫忍不住搞笑說：「係啦，志偉係佢老竇。（傳Shirley唔聽志偉電話？）佢忙打緊邊爐？」問到可會勸對方努力工作？阿倫沒好氣說：「唔係今時今日，長遠嘅日子要識自己照顧自己，唔可以靠身邊人提點自己，要自己面對。」至於演藝人協會會否幫手，他說：「問會長啦，曾經同佢講過唔使咁騰雞，傳媒係朋友，唔係個個對你唔好，睇嘢角度要扭正啲。」有傳酒店截Shirley房電，阿倫抵死笑說：「唔需要，叫佢走咪得囉，使唔使喺門口搵煙攻佢？」
區瑞強愛藏帽
同場的區瑞強（Albert）將於6月舉行入行40周年演唱會，將邀志偉、阿倫等老友做嘉賓，阿倫笑言要揭甩佢頂帽，Albert說：「佢咁做冇驚喜，只係想篤我要害。」家中珍藏幾百頂帽的他，最貴一頂由太太所送，他說：「近萬蚊，係手造。」
文：音樂組