四度結片緣 凌波錯過見面留憾
當年與李麗華同是邵氏當家影星的凌波夫婦因3月底將出門，故昨日一大班朋友包括姜大偉與李琳琳等特別在港飯敍。對於李麗華離世，眾人大表感慨，凌波自言跟李麗華曾合作四部電影，包括《萬古流芳》與《故都春夢》等，最後合作一部是《新紅樓夢》，凌波反串與李麗華擔演男、女主角，而金漢則為該片導演。
凌波與金漢昨日不約而同表示李麗華是他們很尊敬的演員，對方當年在新加坡定居時，兩人更不時往探望，直至後期李麗華身體欠佳時才減少見面，凌波說：「後期佢唔舒服，我哋想去探佢，佢屋企嘅工人都會話佢瞓咗、唔係太舒服咁，錯過咗好多見面嘅機會。（有甚麼難忘事？）記得有一次我哋同李麗華一齊食飯，咁啱撞到成龍，佢口花花咁話我哋呢個係世紀飯局。」
李琳琳：唔捨得都冇辦法
而當年是童星的藝人姜大偉指年幼時有幸與對方合作，更叫對方做「小咪媽媽」：「我爸爸（嚴化）喺粵語片年代曾經同佢合作，自己年幼時亦有幸同呢位前輩結片緣，舊年代金像獎拎個終身成就獎去佢屋企，但當時佢入咗醫院，個獎就交低畀佢囡囡，最後都冇見到佢，所以都幾遺憾。」李琳琳亦對前輩離世表惋惜，與李麗華女兒相熟的她已第一時間致電慰問：「好難過同唔捨得，但都冇辦法。」