郭偉亮滑雪 仆到拗柴坐輪椅
郭偉亮（Eric）因樣貌酷似「鐵甲奇俠」羅拔唐尼（Robert Downey Jr.）而獲封「港版Iron Man」，他日前與老婆葉佩雯在北海道享受滑雪假期，Eric原本踩滑雪板在冰天雪地一顯身手，卻失手慘變「拗柴Man」，因左手左腳動彈不得，要老婆變身看護貼身服侍！
郭偉亮連日來上載在北海道雪山的滑雪短片及相片，起初片中見他踩着滑雪板在雪地滑行跳躍，盡顯靈活身手，但在前日上載的短片中見他跳上滑行路軌卻不慎失手，凌空飛起的他雙手先落地，並翻了兩個觔斗，最後面朝地撻在雪地上！他事後在Instagram「報告」傷勢，相中的他攤坐梳化，左手左腳同時敷冰，但不忘留言自娛：「左手左腳at the same time can be challenging（在同一時間受傷，是具有挑戰性的）。」葉佩雯（Grace）則留言鼓勵老公：「No pain no gain ，小意外整親在所難免，希望好快好番。」Eric因行動不便要以輪椅代步，但不忘與表哥苦中作樂行超市，Grace上載短片並留言：「表哥表弟患難見真情，冇得滑雪惟有Shopping。」Eric揸機拍片，並取笑表哥平日推購物車，今次卻要推輪椅。
老婆變看護貼身服侍
Eric前晚接受記者訪問時苦笑，坦言傷勢不輕：「好嚴重呀，嚴重到依家冇得玩呀！嚟緊呢3日滑唔到雪，好嚴重呀！」並語帶無奈：「一直滑都冇事，跳得好好，但最後放鬆咗就跌咗落坑。原本諗住約埋表哥玩，因為佢唔玩花式嘅，我打算玩埋最後一次就唔玩，點知出咗事！拗咗左手同埋左腳，呢次真係『阻手阻腳』啦，腫晒囉，敷咗成日冰！」他表示最慘是行動不便，步伐似足90歲阿伯，但現時由老婆照顧的他頓時變了大少爺：「多謝老婆幫我抹身，我以前洗面都冇咁乾淨，佢仲幫我黐埋黑頭貼，從未試過咁享受！（老婆畀你搞死？）咁老公梗係要搞死老婆啦！」Grace則沒好氣說：「諗住嚟休息，點知變咗私家看護！」
文：音樂組