李逸朗攬錫黃夏蕙：想即刻退錢！

林盛斌（左）與趙永洪（右）羨慕李逸朗好艷福。

演員李逸朗、林盛斌（Bob）、黃夏蕙、趙永洪、林作、程芷渝、陳蕊蕊、黃榕、尹蓁晞昨日在鯉魚門為電影《江湖三傻》開鏡。合照時，阿Bob等起哄要李逸朗與黃夏蕙預演攬攬錫錫，被「賣豬仔」的李逸朗笑說：「簽約嗰陣唔知同夏蕙BB有激情戲，知道咗想即刻畀番錢公司。（想唔拍？）唔收錢都拍！依家惟有又收錢又拍囉，我會分享嘅，濕吻就交畀趙永洪，床戲就交畀阿Bob，我坐喺旁邊觀摩就OK。喺我哋心入面，一百個女仔都比唔上一個夏蕙BB。」

Bob透露戲中與李逸朗、趙永洪誤打誤撞成為男妓，戲中有不少爆笑位，對於黃榕指戲中要摸遍阿Bob全身，他說：「哦，咁重要部位點都留番畀老婆摸，不過李逸朗就最開心，因為佢同黃夏蕙有床上戲！」趙永洪則搞gag說：「角色名叫陳浩南，同謝芷倫演一對，佢係細細粒，但細細粒點解變咗咁大粒？我講緊佢粒蚊瘌呀！」

李逸朗（左起）、Bob及趙永洪擺出「誘人」甫士。	愈減愈肥的尹蓁晞（左），與黃榕鬥性感。	夏蕙BB上慣頭炷香，其他女仔點夠佢嚟！

黃榕做Gym縮胸

黃榕與尹蓁晞則齊齊低胸晒事業線，黃榕自爆做Gym令上圍縮水由C變B，要買過所有Bra，她說：「戲入面我哋要色誘阿Bob，要摸佢全身、誘惑佢，但重要部位唔使摸，不過我想摸，我講想摸佢塊面呀，好多肉好得意。」被指愈減愈肥的尹蓁晞說：「努力想減肥，盡量一日食一餐，依家55Kg。」

文：影視組