黃宗澤臨尾入花叢24美相送
藝人黃宗澤演出新劇艷福無邊，獲安排24位美女大演對手戲，他打趣說自己「好攰」，又笑言要傳足24段緋聞以「創紀錄」。當問到會否怕女友呷醋時，他答：「做嘢啫……頭先全程我只敢直望呀！」
已約滿無綫的黃宗澤（Bosco）將以演出新劇《溏心風暴3》作為「告別作」，有關方面隆重其事，昨午假電視城舉行記者會，並安排「24美」包括黃翠如、鄭希怡、楊柳青、馮盈盈、劉穎鏇、張寶兒、劉溫馨及陳偉琪等陪伴登場，霸氣Bosco「坐龍椅」合照，一眾佳麗燕瘦環肥加性感，其中楊柳青更「中門大開」吸睛。據悉，所有女演員都與他有感情線，名副其實的艷福無邊。
唔敢（目及）楊柳青
受訪時Bosco卻笑指自己「好攰」：「唔知嘅以為我有份投資，可能係我最後一次以無綫人身份拍劇，益吓我啩。（同女友備案？）冇喎，做嘢啫，佢睇到先算啦。（唔驚傳緋聞？）係就傳晒咁多個，等我創吓電視史上最多戲中女友，同埋緋聞女友嘅紀錄，韋小寶都係得7個咋！其實愈多愈好，冇人信嘛。（今日楊柳青好性感。）頭先我全程只敢直望呀！」談到相信會與不少女拍檔有床戲，Bosco笑謂：「咁我都要露，唔通着住衫演床戲咩？依家磅數OK，操少少啦！」
陳偉琪驚人腹肌
楊柳青則透露自己於劇中扮演武打女演員，故會有動作場面，自己亦相當期待。問到會否介意與Bosco有「動作」時，她笑答：「唔介意，咁靚仔喎。」而以運動Top上陣的陳偉琪被發現腹肌很深，她事後接受電話訪問解釋：「真係冇做過任何嘢，只係我平日鍾意做運動減肥啫，有少少成績咁。（同Bosco有親熱場面？）嗰場戲都幾大膽，係咪唔講得住呢？」
文：影視組