G.E.M.騎劫音樂節辣(興)全場

「惹火人物」G.E.M.（鄧紫棋）前晚「失驚無神」登上「Dragonland Music Festival」的One Night Pop舞台，跟壓軸表演的國際人氣組合Black Eyed Peas合唱《Where Is The Love》，卻遭台下觀眾噓爆，有人更激動大叫「落台啦」！其後，大批觀眾在社交網平台鬧爆，指「係宇宙G.E.M.亂入毀咗首歌」、「阿漿做乜X？完全破壞晒」，甚至有人連打幾個中指emoji：「無啦啦彈個宇宙G.E.M.……搞到冇晒Feel，一出場就爆多人噓佢，好正。」

一連三日的「Dragonland Music Festival」由黎明旗下製作公司Player One主辦，前晚應邀的歌手、組合全是國際級巨星，除了BEP還有Iggy Azalea、Carly Rae Jepsen及Mike Posner。據知G.E.M.的出現，大會事前全不知情，更未得主辦方同意，有人目睹G.E.M.上台前曾遭工作人員嘗試阻止。主辦單位負責人王凱文（Alvin）得知有人硬要上台，已第一時間飛奔到後台了解事件，因主辦單位要控制整個演唱會的流程及質素，以防有任何意外情況，但G.E.M.在混亂間擸咪衝上台，令主辦方非常不滿！

G.E.M.指與Black Eyed Peas演出是即興發生。	G.E.M.唱完與will.i.am攬攬，懶理被噓。	G.E.M.事前在後台自拍，準備上台演出。

BEP經理人致歉

事後，Alvin坦承完全不知道G.E.M.現身，他語帶無奈說：「成件事係好突然，我哋真係唔知道！」又默認曾有人阻止她上台：「當時我唔喺後台，如果工作人員有疑問都係正常嘅，但我趕到後台，佢已經上咗台。」Alvin直言G.E.M.的出現令演唱會主題有所偏離，就此曾跟BEP的經理人溝通：「佢知道咗成件事後，連續五次Say Sorry！我只可以話如果請嚟嘅嘉賓係搵本地歌手嚟演出，基本上係要通知我哋嘅。」他坦言事件上有人安排失當，對G.E.M.演出惹來連串負評，他說：「今次係公司第一次搞音樂節，最擔心係影響大會品牌。」

認大會事前唔知情

至於G.E.M.受訪時亦承認大會事前不知情，自己本來去睇騷，曾透過短訊與BEP成員will.i.am聯絡：「我話會嚟睇，佢知道咗就叫不如晚上一齊唱，我仲問佢係咪認真，佢即刻將歌詞Send嚟畀我。」她坦言整件事得will.i.am及其經理人知道，自己花上一個下午背歌詞及練歌，形容今次是驚喜邀請及即興演出，但否認被阻止上台：「係will.i.am個Manager去咗Panel同佢哋講，我係會上台一齊唱，佢哋就畀支咪我。」

文：音樂組