成日被人話「大唔透」的22歲加拿大小天王Justin Bieber，日前現身荷里活街頭時，被狗仔隊拍得褲襠有一撻水漬，懷疑他小解時「走火」射濕自己，認真係「細事難尿」！
Justin Bieber都22歲仔啦！但係少年出道嘅佢成日表現幼稚，犯錯多多，被人批評「大唔透」。最近佢不時向舊愛Selena Gomez個新歡The Weeknd冷嘲熱諷，個人勁躁底（Pissed），點知佢日前就真係「Pissed」喇！不過今次係解「瀨濕咗」嘅意思！
Justin周三現身荷里活街頭，一身潮人打扮嘅佢，着住估計賣400美元（約3,120港元）嘅運動褲，但狗仔隊就拍到佢條褲堅係「潮咗」，褲襠位置有一大撻水漬，懷疑佢瞄準有問題，又或者「擦槍走火」射濕咗自己！
批相出街後引來網友熱議，Justin亦好睇得開，喺Instagram將自己屙濕褲嘅照片，並排放喺1998年電影《超齡插班生》（Billy Madison）中阿當桑迪拿（Adam Sandler）屙濕褲劇照隔籬，仲引用片中對白話：「你唔屙濕條褲，你就唔型啦！」自嘲又好，死撐又好，佢之後再喺Twitter留言：「有人送花畀我，而我揸車時轉彎位，搞到啲水倒濕咗下體位置，不過大家覺得好笑嘅話我都冇所謂，好嘢！」究竟佢係「解釋」定係「掩飾」？睇怕一般人都好難「辨識」喇！
文：外娛組