張紋嘉上遊戲節目贏Coupon換三餐
出道十年的前組合HotCha成員張紋嘉（Crystal）昨日到電台宣傳新歌，下月中與星娛樂約滿的她將向影壇及舞台劇發展。Crystal自爆捱窮十年，要參加遊戲節目贏美食券換三餐溫飽，更直言從未畀過家用父母：「勁愧對佢哋！」
下月約滿星娛樂的Crystal，昨日為最後一首新歌《少女的球鞋》接受電台訪問，並多次感謝公司仍為她落力宣傳：「你知一約滿就會入雪櫃，聽好多人講佢哋好努力推首歌，送畀我最好嘅禮物。（你送咩畀公司？）以身相許，希望之後再好啲，唔好令佢哋失望。」Crystal坦言有意簽經理人：「想主力演戲方面發展。」
練歌為名呃飯食
今年是Crystal入行十周年，她驚爆過去一直捱窮：「當年做HotCha不停參加電視遊戲節目，目的係為咗每日三餐，因為贏咗有好多嘢食券，日日去換，連食店姐姐都認得我。」又爆為慳飯錢，藉詞到卡拉OK練歌叫飯食入公司數！身為獨女的Crystal直言從未給予父母家用：「係勁愧對父母，真係冇畀過錢佢哋，只係請佢哋食飯，爸爸好好，每次我經濟出現問題都係佢救我。」
儲定錢做樓奴
問到擔不擔心日後收入減少？Crystal說：「冇辦法，預咗比做歌手更辛苦。（要求包養？）黐線，邊個肯要我？寧願辛苦啲做舞台劇閒角。」隨即自爆收過「問價」訊息：「平到爆，都幾唔開心，見啲人話收好高價。（100萬過一晚肯唔肯？）唔係錢問題，唔需要求包養，我係慳妹。」她又直言有留意無綫節目《有樓萬事足》：「最留意係嗰個有樓先至拍拖，自己唔介意男友有冇樓，每個人有唔同睇法。我唔怕成為樓奴，一定要買層樓先安樂，不過依家未儲到錢。租樓好辛苦o架，一、兩年就畀人趕走。」
文：音樂組