鐵人陳展鵬連踩53小時

「視帝」陳展鵬與姚子羚，昨日在電視城為無綫新劇《天命》開工。昨日氣溫急降到12度，問剃了頭扮演和坤的陳展鵬凍不凍？他笑言：「呢個係前哨戰，3月去北京、橫店拍仲凍，好耐未試過拍古裝唔使流汗，愈凍愈好。」

忟憎躁底易受傷

陳展鵬拍攝時先後傷頸和右膝，現時右膝傷勢已九成痊愈，稍後會再投入拍攝動作場面。提到馬國明拍《深宮計》連踩超過27小時，令人嘩然，陳展鵬說：「27個鐘對我嚟講好正常，當然有多啲時間休息，個樣會精神飽滿啲，又唔會咁易受傷，套劇受傷咗兩次都係因為休息唔夠。（最長踩幾多個鐘？）拍《叛逃》時試過踩53個鐘，嗰陣年半拍五套劇，好多時會疊住開工，又唔係完全冇瞓，喺車程嘅時候瞓一陣。（點頂眼瞓？）靠意志，好似當兵打仗咁。做演員最辛苦其實就係冇得瞓，唔夠瞓個人會好躁底、好忟憎，一埋位就要集中精神。」

53個鐘咁勁？堅唔堅呀？（設計對白）

姚子羚透露將與李施嬅到橫店拍外景。

姚子羚爭做最愛

姚子羚透露已向近年在內地發展的關智斌取經，預備裝備到橫店拍外景。問到男友會否去探班？她說：「佢冇講喎，自己做嘢都想專心少少，同埋今次同李施嬅同房，就算佢嚟都冇地方瞓。（袁偉豪呢？）袁偉豪唔係呢套劇，就更加冇位啦。（信唔信李施嬅追袁偉豪撻着？）係一個開心嘅笑話，希望佢哋成事，下次可能傳陳山聰。（佢哋有冇可能發展？）暫時睇唔到有可能。同埋胡定欣話李施嬅最愛佢，其實李施嬅最愛係我，我哋成日一齊去旅行。」

文：影視組