林作被何傲芝踢爆Louisa追魂Call
大律師林作與「十優港姐」麥明詩關係欲斷難斷，聲稱暫時唔拍拖住的他，昨日在記者面前對何傲芝口花花，但女方完全唔受，反踢爆林作收到「Louisa（麥明詩英文名）」來電，並說：「佢鍾意香港小姐o架！」
林作與林母王莉妮昨日在林宅接受奇妙電視節目《喜出望外－何家姊妹何家餐》主持何傲芝（Gigi）及何傲兒（Lily）訪問，林作自爆對Gigi有好感，還發揮他的大狀口才，對Gigi口花花，大讚她「正」！林母亦開出對新抱的要求，說：「要賢良淑德、入得廚房、出得廳堂，要有教養、要靚，仲要一索得男！（何家姊妹OK？）幾靚女，頭先佢哋有入廚房，咁啱傲兒又叫Lily，真係有緣。（有冇心痛林作之前試戲畀女摑？）咁耐以嚟，我都未打過佢一巴呀！我同佢講咗，下不為例！」
「冇錢邊有女？」
問林作何家姊妹是否他那杯茶？他說：「我鍾意家姐，Gigi姐！梗係欣賞佢內涵啦，唔通樣咩！哈哈哈，極度欣賞佢！（追人？）佢條件太好啦！況且我暫時冇諗結婚，拍拖都好大負擔o架，搵錢先，事業為重，冇錢邊有女？」
Gigi亦即時對林作的單身形象玩踢爆，她說：「頭先我見到林作手機有來電，寫住Louisa（麥明詩英文名），佢鍾意香港小姐(口架)！（佢讚你正，有冇機會發展？）佢鍾意姐姐啫！唔好搞啲咁嘅嘢，頭先林媽媽都講咗要智慧與美貌並重，一聽就知唔關我事。」
麥明詩一於懶理
另方面，麥明詩接受電話訪問時，對急Call男方解釋說：「係見到佢嘅專欄度寫咗一篇文提及我，搵佢了解一下啫。（佢話冧何傲芝喎，似乎想追佢！）佢鍾意點就點啦，Action speaks louder than words（事實勝於雄辯）！（覺得佢係口花撩女仔？）唔知喎，我又唔係其他女仔！」
文：影視組