黎明王者登場勁舞幫歌迷暖身

黎明（Leon）昨晚在中環海濱摩天輪旁為一連三日Dragonland Music Festival－One Night Stand打頭陣舉行《黎明Leon's Penguins in Live 2017》，全場16,000名觀眾，幾乎全企位，只得舞台兩側設有包廂位，有位坐有得飲同食。由於是露天場地，加上氣溫驟降，入場觀眾及嘉賓都重裝備，又大褸又冷衫，還戴上冷帽和頸巾保暖。

自爆剪咗髮勁精神

演唱會於晚上8時半由黎明以快歌《一比一》揭開序幕，但即有觀眾大叫：「睇唔到！」黎明與一班舞蹈員穿上色彩繽紛的歌衫出場，身穿橙白色斜紋外套的Leon，頭戴閃到爆皇冠帽襯黑超出場，全場歌迷high爆，舞蹈員手執波板糖和公仔勁跳，氣氛熱鬧！今次舞台不但是250度弧形設計，還有一條魚骨形特長的catwalk，唱完第一首歌黎明就除下皇冠帽，隨即高唱《你係我嘅》，黎明走到catwalk舞台，歌迷近距離見到他，尖叫不停，走到舞台盡頭，有性感兔女郎現身與黎明共舞。

黎明戴住巨型皇冠出場，好有王者氣勢喎！	黎明與性感兔女郎共舞。	黎明騷昨晚在中環海濱摩天輪旁舉行，與16,000名觀眾狂歡。

黎明一口氣連唱三首歌後，他說：「Hi，大家好，唔凍呀呵！過往唔同地方開騷，大家坐得耐囉，今次難得大家應承企一晚，多謝晒，後面啲朋友唔使擔心，我都會好快速間歇跑過嚟，間歇性可快可慢。」黎明又無厘頭對觀眾表示自己剪了頭髮，個人精神了。當他準備唱《相逢在雨中》時，黎明終於有「金句」：「有一隻歌大家聽過就會聽過，知道就會知道，個天都好就我哋。」應該是感謝天公作美，未有落雨。

歌迷帶摺櫈被阻止

其實昨午已有約三百歌迷在場外排隊，希望搶先入場霸頭位，有些更戴上為今次個唱設計的企鵝帽連頸巾，甚至有歌迷通宵排隊。雖然黎明所屬公司Amusic日前發出「15禁的現場守則」，但做隨身行李檢查時，依然有歌迷想帶外來食物飲品，甚至摺櫈進場，即被保安阻止。而前晚近八時黎明為演唱會綵排時，警察公共關係科證實一名41歲內地持雙程證女子企在海旁欄杆，有職員與女子發生爭執，該女子不肯離開，警方到場後，把該女士送往醫院。

文：音樂組