曾志偉、陳百祥（阿叻）、吳鎮宇及梁佩瑚等與吳婉芳夫婦分屬好友，阿叻及志偉更是介紹吳婉芳給胡家驊認識的人，對於消息感到愕然，出席活動的鎮宇更眼紅紅表示接受不到。
曾志偉：「我嚟之前知喇！因為阿倫（譚詠麟）打電話問我真定假，我都唔想係真，都想去證實！我都算係半個介紹佢哋兩公婆認識嘅人。（印象如何？）好多難忘事，當年我哋日以繼夜，夜以繼日一齊玩，仲一齊去日本，佢係一個好冇所謂嘅人。（愕然？）我都唔開心，難受，我哋識咗三十幾年！（有病？）唔知，如果唔係我一早搵咗佢啦！」
陳百祥：「平時喺馬場見佢都冇乜嘢，佢都好風趣、又冇乜計較，佢都好好命，有個咁好嘅老婆。我叫咗秘書傳個短訊畀May，呢個時候唔會安慰佢住，佢都未必接受到，但相信佢識點處理。（佢係咪之前有大病？）我唔知！」
現任慧妍雅集信託委員會副主席王愛倫：「吓！佢咁年輕，可惜。May以前係慧妍嘅會長，我哋會同會長商量，大家都係師姐師妹，又識得胡家驊，會問候佢，睇吓可以做啲乜，會提供協助。」
吳鎮宇：「我接受唔到，畀我搞清楚乜嘢事先，你哋再問我就要出去打電話，我未求證清楚就當唔係！你哋問啲開心嘢啦！早知係問呢啲我就唔嚟啦！」
李家聲表示尚未收到消息，他稱去年仍有跟吳婉芳夫婦見面：「我哋訓練班同學定時都會見面食飯，吳婉芳都會帶埋老公出嚟，所以我都同佢老公好熟。（印象如何？）係超級好人，一個好錫我嘅兄長。（知佢老公有病？）唔太清楚。（會問候？）等佢公布啦！作為好朋友，應該在背後支持佢！」
身為吳婉芳好友的梁佩瑚，對於傳出胡家驊猝逝，她回覆本報時稱全不知情，也不知道胡家驊是否抱恙，更稱已打電話給吳婉芳但聯絡不上。胡家驊最近一次公開露面是本月十九日，翌日吳婉芳則和好友梁佩瑚相聚歎下午茶並拍下合照，相中見吳婉芳素顏現身，並對着鏡頭保持微笑，而梁佩瑚更留言：「快樂的下午茶。」