謝婷婷人肉速遞 飛撲冧鷹眼

謝婷婷於紐約時間15日現身Michael Kors 2017秋冬時裝騷，同場還有台灣女星安心亞、型男劉以豪及內地女星古力娜扎等，超模Kendall Jenner及Joan Smalls有份行騷，場面熱鬧。

早前傳出婷婷與荷里活型男「鷹眼」謝洛美維拿拍拖，問她有否趁紐約之行找緋聞男友謝洛美？婷婷表示不會，因對方身在洛杉磯，而她亦坦承剛由洛杉磯過來，並已跟謝洛美見面，關係相當要好，至於兩人是否共度情人節？婷婷說﹕「冇，情人節已經喺度。（你哋係發展中定已經係男女朋友關係？）唔答，哈哈！」

秘製精油醫霆鋒

雖然婷婷封嘴，但問到會否覺得異地戀難以維繫？她卻露口風稱不認為，但現時專心工作：「因為我拍緊套戲，好專心做嘢，冇咁多時間，細個拍拖為主，一定要愛情第一，依家唔知係咪大個咗，愈嚟愈鍾意我嘅工作，想放晒啲心機同時間喺做嘢度。 」

「鷹眼」早前來港已與婷婷約會，今次輪到婷婷去洛杉磯會情郎。	李冰冰帥氣打扮欣賞時裝騷。	第一次參與國際大騷的安心亞大嗌緊張。

另外，提到其兄謝霆鋒因近三年來長期拋鑊及快速切菜而患上筋膜炎，婷婷直言知情：「佢有排好痛，成日見醫生，我最近鍾意用天然精油，自己整咗啲藥畀佢，我問佢信唔信我，佢話梗係信，佢就咁食咗，我話你問都唔問就食，佢話信我，係天然嘅，唔知佢返北京識唔識調。佢食完之後，媽咪同身邊朋友都問我畀咩佢食，因為有好啲，只要令到佢唔痛，佢乜都肯做。」

安心亞處女睇騷

至於安心亞表示首次參與國際大騷，大感新鮮，心情既興奮又期待：「一路上都有點不安，但見大家都忙自己的事情，便覺得沒甚麼好緊張。」她有意到二手店行街，並希望再次品嘗當地的漢堡包。

同日，內地女星李冰冰現身紐約Ralph Lauren時裝騷，身穿軍服元素的外套配貼身牛仔褲加長靴，非常帥氣，與Bella Hadid及Taylor Hill等超模同坐頭排睇騷，其長腿不輸超模。