張衞健回巢搞喊曾勵珍冇計較一分一毫
創造過不少電視劇收視神話的張衞健，離開無綫逾二十年後回歸「母校」，拍攝五十周年台慶劇《大帥哥》。張衞健今次拍劇講心唔講金，向來硬淨的曾勵珍也被他搞喊哽咽。
無綫昨日隆重其事在尖沙咀舉行「歡迎張衞健回巢賀壽參演TVB五十周年台慶劇《大帥哥》」簽約儀式，健仔拖着兩大高層曾勵珍與樂易玲行紅地氈。回娘家講心唔講金的健仔，將記招變成talk show，有笑有淚，充滿人情味：「今次返無綫有三個原因，第一今年係TVB 50歲，非常重要嘅一年，我嘅演藝生命喺呢度誕生，茁壯成長，出去都冇丟架，好感激母校。」
溝過幾多女都知
第二，健仔多謝香港觀眾一直給他的歡呼和掌聲，望為港人拍一部劇，回饋觀眾。健仔續說：「第三個原因係要感謝生命中其中一位重要女人珍姐，珍姐睇住我大，連我喺TVB溝過幾多條女佢都知。佢從來冇逼我回巢，今次係重大日子，佢親自邀請，我二話不說答應。」
希望阿sir高興
健仔更指後期才談及片酬，過程峰迴路轉，並笑言看到價錢「吓」了一聲，但曾勵珍指價錢已很高，他惟有說：「哦，咁好啦！唔好問我損失幾多，我驚反悔！」曾勵珍也對這個仔不計酬勞回巢感動不已，愈說愈激動哽咽起來，要用紙巾拭淚。
尾聲健仔突然一臉嚴肅說：「今日如果阿sir（指邵逸夫）喺度，好想同佢講當年拍完《西遊記》唔續約，的確係因為續約價錢唔啱，但係今次再返嚟TVB冇計較過一分一毫，希望佢老人家高興，觀眾睇得開心，畫上完美的句號。」
受訪時，提到曾勵珍感動得哽咽，健仔謂：「係好感動，呢個功利社會好難唔計較金錢合作。去到呢個年紀，唔計得咁多。20年不斷有人搵我，但今次唔同，係50周年，呢個機構同香港息息相關。觀眾睇住我大，有份感情，多年嚟有個心願，好想用廣東話去拍一套戲。」
健仔指今次拍劇最要爭取的是瞓覺：「老人家唔捱得，咁耐冇拍想有最佳狀態，唔想每日瞓兩個鐘，想有十個鐘休息，珍姐話，吓？最尾監製話咁樣要拍半年喎。」此外，劇集的女主角將由蔡思貝擔任，其他演員有洪永城、曹永廉、徐榮、譚凱琪等。
文：影視組