洪卓立突襲啜爆湯怡
藝人湯怡昨日處女下海出戰渣打馬拉松半馬賽事，成功以2小時05分佳績衝過終點，並獲拍拖十年的男友洪卓立神秘現身遞水兼送吻，氹得滿頭大汗、面紅紅的湯怡不停冧笑，如預演婚禮般溫馨；而跑全馬的胡諾言以3小時57分完成，太太陳琪及女兒亦在終點迎接他衝線。
每年一度的渣打馬拉松盛事昨日舉行，吸引藝人湯怡、胡諾言、崔碧珈、周子駒、歌手AGA、馮允謙、鄭融、DJ Donald及細So參加，有「肯雅徐」之稱的徐濠縈因感冒忍痛缺席。湯怡昨晨五時左右與跑友崔碧珈、AGA及馮允謙等於尖沙咀起點集合，她左手手臂印上目標時間2小時05分，並透露為儲熱量連日狂食飯：「感覺長咗唔少肉，磅數可能係最巔峰添。」
被隻狗嘈醒
一直有跑步練氣兼收身的湯怡首次出戰21公里半馬賽事，並成功於2小時05分目標時間衝線，身為男友的洪卓立（Ken）為給女友驚喜竟神秘現身，嚇得湯怡目瞪口呆，Ken更細心地遞上水樽，更在記者要求下親吻湯怡額頭，儼如結婚般甜蜜，湯怡亦開心笑到四萬咁口。
獲男友神秘撐場的湯怡坦言感意外：「冇諗過佢嚟等我，好感動！」Ken即借愛犬過橋說：「冇呀，畀隻狗嘈醒瞓唔着咪過嚟囉！」氹得湯怡哈哈大笑說：「非常感動，人生第一次半馬，2月12日好有紀念性。」Ken與湯怡今年拍拖十周年，記者笑指以為Ken是來求婚，湯怡直指他不會在公開場合「做戲」：「佢唔會嘅。（怕惹你黑面？）我唔笑就係黑面啦！」Ken大讚湯怡夠厲害，當初估計對方要2小時15分才能完成。
圓夢跑全馬
而第二年參加馬拉松的胡諾言（胡仔）起跑前接受訪問，他表示去年跑半馬，今年參加全馬挑戰自己，希望可在四個半小時內完成：「我又唔係運動員，我演員嚟啫！」並透露有向好友陳山聰請教，問到太太陳琪有否叮囑他要小心？胡仔說：「佢有叫我小心啲，亦話要車我出嚟，我話唔使，我跑步啫，唔想影響到屋企人，搭車都好方便，仲話跑完返去同老人家飲茶。」
最終胡仔以3小時57分衝過終點，獲太太陳琪及女兒在終點迎接，胡仔坦言首次跑全馬有這成績算超額完成：「其實成績對自己唔重要，反而最開心見到老婆同個女喺度。」胡仔透露有意訓練兒子跑步，並再次感激陳山聰教導，令他實現跑畢全馬夢想。
文：音樂組
攝：鄭家俊、劉智源