李佳芯人肉引水：終於Feel到條「線」

王浩信與李佳芯前晚在中環為劇集《踩過界》拍攝一場雨中浪漫跳舞戲，現場出動水車製造下雨效果，但因風大加上氣溫只得17度，浪漫背後的實情是兩人全身濕透凍得騰騰震，停機時即披毛巾及飲薑茶取暖。

問到可有做足禦寒措施？王浩信說：「就係冇做足禦寒措施，依家半真空(口架)！本來包保鮮紙嘅，但跳起嚟會沙沙聲，所以就冇包保鮮紙。初時都OK，但愈夜愈凍，Feel到佳芯隻手有啲抖震，惟有互相扶持。」

凍到震的李佳芯笑言有得着：「已經過咗喺香港最凍嘅一日！我有包保鮮紙，但條裙係低V，我終於Feel到自己條『線』（指「事業線」），因為啲水直落，呢個感受好深，一淋嗰吓就嘩！」王浩信笑說幸好拍攝效果不俗：「多咗呢場《星光夢裡「痕」》都值得嘅！好痕又好凍！」

王浩信與李佳芯埋位前繼續練舞。	王浩信攬住李佳芯雨中起舞勁浪漫，背後凍到騰騰震。	由頭淋到腳，兩人一停機即飲薑茶取暖。

觸及敏感部位零尷尬

王浩信與李佳芯透露事前排舞兩個小時，部分舞步要臨場即學即跳，惟有用盡自己所學去做。跳舞時，李佳芯主動捉着王浩信的手放在自己腹部，王浩信相當有風度問清楚會否令她尷尬：「要就番個位避免尷尬情況發生，我自己一向好小心去避免。」李佳芯笑說冇諗咁多：「我舒服OK(口架)！放心交畀我。戲裏面講我對佢好主動，跳舞時要拉佢嚟攬住我，有好多呢類身體接觸。」王浩信也不禁讚李佳芯：「佢角色好Open、好主動！」

文：影視組