Tommy仔話之你豎中指 最緊要有「奈屎」

開騷多人睇 曱甴變男神？

娛樂圈跟紅頂白是常識吧！先天不足又要做明星，好似Tommy咁，人格破晒產欠債、走數、醉駕、用Big Bang演唱會飛尾搵粉絲着數，醜事一籮籮都未打沉佢個明星夢，堅持做隻人見人憎嘅「曱甴小強」！佢抽水功力去到神級境界，明抄Big Bang嘅G-Dragon（GD）個MV唔在講，仲要喺機場「小強硬上弓」，要GD睇佢條惡搞MV，仲騎劫對方影合照，真係有「奈屎」（Noise）！理得你「竪中指」吖，難得係有人buy喎！早排佢搵埋兩位史前兄弟林詠倫（Alan）、郁禮賢（Tim）嚟個「翻生侏羅紀」演唱會，開騷嗰晚竟有九成入座率，我Nuts哥都寫個「服」字畀佢！

肯做隻「小強」喺娛樂圈儼如練成「不死身」，包保你大紅大紫，仲會「曱甴」都會變「男神」。我Nuts哥冇神經錯亂，當年周星馳喺《唐伯虎點秋香》為潛入華府做阿四，隨地踩死咗隻「小強」，用嚟對抗對手梁榮忠賣身葬父嗰場戲可謂一絕，星爺創造「小強」，電影大賣，小強亦聲名大噪，黃子華同樣靠「小強」喺電視劇《男親女愛》食胡，創下無綫收視神話，子華亦憑小強變「男神」。當年仲係新人未出頭嘅馬國明，喺子華嘅MV扮小強，經小強加持，馬國明依家一樣被封男神！難怪Tommy享受「樂壇小強」呢個封號。

周永恒拋妻棄女 面不改容

Tommy呢種小強不死身，娛圈入面都有幾個出晒名，周永恒、張致恒同吳浩康，夾埋成為「樂壇四小強」。呢三小強嘅共通點就係沉迷女色「衰鹹濕」，我Nuts哥唔係扮清高，酒色財氣邊個男人唔好？學葉念琛電影經典名句話齋：「十個男人九個滾，剩番一個仲諗緊！」但滾到連人格都冇就係世紀賤男！當中自認「人渣」嘅周永恒（Roy）算係表表者，背妻偷食，放埋同小三淫照上網開心share，色字行頭，拋妻棄女面不改容，小三完咗又有小四，每次分手都反轉豬肚臭氣熏天，呢隻小強賤性難改，我Nuts哥會買定花生，睇吓邊個女仔撼頭埋牆去佢身邊。

而「偷食積犯」點漏得張致恒（Steven）！受害者有傅又宣（前名傅佩嘉）、鍾舒漫、莊端兒，死性不改嘅Steven，我Nuts哥都幫佢唱句：「人天生根本都不可以愛死身邊的一個……」呢隻小強溝女去到幾盡？當年佢秘戀傅又宣就試過做「衣櫃裏的男人」，急call老友將佢連人帶櫃「搬離」愛巢，成功避過傳媒耳目，係咪經典先？我Nuts哥覺得呢隻小強唯一可取係夠坦白，認鹹濕話自己「性上癮」，病嚟喎，博大家原諒？有病就要睇醫生啦，人格破產有排洗底。

吳浩康愛偷食 靚聲嘥晒

最後一隻小強吳浩康（Deep）我Nuts哥對佢最失望，有把唱得嘅靚聲，就係私生活亂晒龍！同佢拍拖唔係花旦就係靚女，Deep當自己係「情聖」，明戀胡定欣就暗撻莊思敏，後尾以為呢隻小強修心養性娶鍾舒漫，可惜嗰鋪偷食癮戒唔甩，當街啜爆巨胸Yvette斷到正，呢鑊上主都打救唔到佢，女神都要死心。不過，呢隻小強Deep求生力頑強，早排Nuts哥有睇佢出戰真人騷唱歌節目，似乎又贏番唔少人好感。樂壇四小強入面，上天賦予Deep最大嘅歌唱天分，繼續做神憎鬼厭嘅曱甴定係眾人喜愛嘅歌手就佢自己揀嘞。