林作寫小學雞情歌Carman：有少少作嘔
「十優港姐」麥明詩舊愛林作被指移情別戀，與Bingo隊長Carman傳緋聞，除公開稱Carman為「女友」外，又自薦獻出第一次為她新歌填詞，可惜大律師卻寫出「小學雞」作品，淪為「作嘔歌」最終無情被foul！自稱人如其名愛創作的林作，一時口快自爆經常寫情信，令人揣測收信人是麥明詩。
前晚女子組合Bingo、林作及無綫藝人黃建東（Derek）等出席春茗活動，勁冧Bingo隊長Carman的林作全程黐到實，更以「我女朋友」作介紹，令女方不停傻笑。據知林作為將Carman追到手再出新招，自薦為「女神」的新歌處男作詞，而歌詞中「睇得上你已經係你最大福氣，請別再給我表現得不三不四」及「已經打開心扉默默靜候着你」，擺明憑歌寄意！
寫情信冧麥明詩
可惜襄王有心，神女無情，Carman直批歌詞：「有少少作嘔囉，有啲老套，佢（林作）鍾意着中山裝。」最終遭唱片公司棄用，不過Carman亦安慰林作：「佢第一次填，都寫得幾好，有文采，我都有少少感動，但我嗰首係廣東歌，份歌詞啱國語歌用。」Carman的隊員Odilia亦笑指林作的作歌追女手法：「好驚，好瘋狂！」但她不會呷醋Carman被捧上天，她笑說：「我鍾意高大、大隻嘅男仔。」Carman更踢爆林作行「經理人政策」博好感，令經理人也嫌煩。
問林作歌詞被嫌棄有否失望？他強調只是初稿，非憑歌寄意，又笑言「詞聖」林夕是他遠房親戚，將來的兒子會改名為林作詞、林作詩、林作文等。被請食檸檬可傷心？他說：「習慣咗喺reject中成長。」他又自爆平時經常寫情信，問到是否寫給麥明詩？他落閘說：「我唔評論佢，哈哈，怕佢呷醋。」
黃建東喪摷頭髮
另外，Derek透露力邀林作合作拍片，並指林作讚他是「港版波叔（Sacha Baron Cohen）」。對於麥明詩批評他之前拍的「印度版PPAP」短片有種族主義之嫌，Derek稱：「林作話一齊拍片，幫我平反。」另外，Derek對林作的一頭亂髮大感好奇，林作表示歡迎任摷，結果摸到林作頭髮亂上加亂，東東大叫：「原來佢有gel頭o架！」
文：音樂組