金燕玲爭女配怕變大熱 志偉想父子檔攞獎
早前勇奪金馬獎女配的金燕玲，將與後輩方皓玟、張雨綺、文詠珊及廖子妤爭奪「最佳女配角」，昨日她現身金像獎入圍記招時表現高興，不諱言重視提名及獎項，但問到有否信心再下一城，金燕玲說：「唔敢睇，隨緣啦！最怕聽到大熱兩個字，到時攞獎同拎唔到個表情都唔知點做。」而新人廖子妤笑指獲悉喜訊一刻「喊到癲咗」：「我一直抱平常心，驚失望，到依家我同身邊幾個好朋友都入咗圍，好開心！」至於文詠珊對於憑陸劍青、梁樂民執導的作品再次角逐獎項感榮幸。
「最佳男配角」方面，有份入圍的曾志偉，對於繼金馬獎後再與兒子曾國祥齊齊有提名，他大讚兒子：「威過老竇添啦！（自己有冇信心？）個個都係老友，有提名都開心，希望同個仔一齊攞獎啦！」而被祝賀短訊吵醒的曾國祥，透露對作品獲12個提名感高興，獎項方面會以平常心面對。
此外，影帝郭富城昨日出席記者會時心情大靚，更以搞鬼韓文及泰文宣讀幕後入圍者，當參演的電影《寒》片團隊榜上有名時，他更為興奮，但事後表示因忙於拍戲，暫未觀賞提名影帝后的入圍作品，問到今屆沒有提名可感失望？他說：「上年都攞咗！我衷心祝福入圍者拎一張好嘅成績表。」