梁佩瑚「蒙古少奶」怒火街頭 老公面青青施冧箍咒

現年46歲的1989年港姐季軍梁佩瑚，去年4月與拍拖不足半年的圈外蒙古商人郭雲飛閃婚，仍處於新婚期的兩人日前下午約5時現身九龍一個商場，並在餐廳門外徘徊視察店內環境。

起初見兩人有講有笑，其後睇餐牌時卻突然發生拗撬，嬲爆的梁佩瑚翹晒手開「機關槍」，郭雲飛則全程頭耷耷，一臉無奈。未知是否因為老公粒聲唔出，梁佩瑚怒氣指數直線飆升，立即轉身離開，郭雲飛面對老婆面色驟變嚇到面青青，機警的他立刻拉老婆入懷，試圖以溫柔化解老婆的怒氣，梁佩瑚被此舉氹番，不禁偷笑起來。耍花槍後梁佩瑚已急速降溫，兩人High tea撐枱腳時其態度更180度轉變，溫馨地餵老公食嘢，戲劇性拍得住電視劇！

郭雲飛陪老婆在名店揀手袋，可惜沒有斬獲。	梁佩瑚同郭雲飛玩自拍，情到濃時更當街錫錫。	梁佩瑚去年4月閃嫁郭雲飛，升呢做「蒙古少奶」。

行名店冧滋滋

用餐過後，兩人手拖手步出餐廳並轉戰名店，郭雲飛使出女人最愛的招式──Shopping，繼續諗計冧老婆。梁佩瑚主攻小型手袋，拎上手睇完一輪後，再貪靚地在鏡前左照右照試款式，郭雲飛亦相當識做，在旁幫手挑選靚袋，氹得老婆冧滋滋，梁佩瑚其後又貼心地替老公挑選銀包。雖然未有斬獲，但無損兩人的心情，他們行到商場中庭位置時更拿出手機面貼面自拍，大晒恩愛！

躁爆轉身走 梁佩瑚嬲到想轉身走人，郭雲飛立即使出「冧箍咒」氹老婆。	冧爆偷笑	下了火的梁佩瑚餵老公食嘢，甜到漏。

轉個頭好戲又上演，梁佩瑚與老公又拖又攬以連體嬰方式轉戰另一名店區，期間忍不住咀嘴，更煙韌得在同一段路上連咀兩次，簡直旁若無人，甜到漏！

文：名人組