崔建邦跣親自己輸點數
現年37歲的藝人崔建邦昨晚參加拳賽，獲一班圈中老友及無綫三大高層現身力挺，與年僅15歲的英國拳手Taqdeer Singh力戰四個回合，最終以點數輸掉賽事。賽後他於台上剖白，表示練到踏上擂台已感滿足，還感激首次到場睇足全場的母親。
藝人崔建邦（Amigo）昨晚參與「E-1 World Championship 2017」拳賽，獲不少圈中好友撐場，包括曾志偉、陳百祥、錢嘉樂、盧惠光、陳庭欣等，無綫三大高層杜之克、余詠珊及曾勵珍也有現身，就連從未看過兒子打拳的崔媽媽亦一早到來。
謝母親捧場
於第7場比賽對戰英國拳手Taqdeer Singh的Amigo，雙方拳來拳往，縱使Amigo中拳致嘴角瘀傷，仍毫無懼色，而睇到相當肉緊的志偉，不時大叫「阿邦o趙佢！」雙方大戰四個回合後，Amigo以點數落敗。Amigo即於台上接受訪問，惜英雄重英雄，讚對手打得好：「我舊年四月開始練，練到去到台上已好滿足，對方年輕咁多，佢打得好好，畀啲掌聲佢。我要多謝媽咪嚟睇，細個我打咁多場佢都冇嚟，今次嚟睇好感動；仲有就係對唔住大家，希望我冇令你哋失望。」
靠意志支撐
Amigo於賽後接受訪問，甫見媽咪即眼濕濕攬到實合照，對於首個回合跣親，笑言只怪自己飲得水多，結果被自己汗水所累；他承認比賽尾段體力不繼，要靠意志支撐。對於無綫高層畀面撐場，他笑謂：「佢哋睇吓同唔同我續約，依家起碼續一年。」
觀戰的志偉指Amigo輸蝕在少實戰：「唔係年紀蝕底，係對方打過好多場，佢自己好耐冇打，所以同阿邦講一定要平常心。」
文：影視組