岑麗香搏命儲錢瞄準千呎豪宅
榮升「強嫂」的岑麗香昨日以短裙Look出席樓盤活動，乘機睇樓的她希望今年可以買過千呎愛巢。雖然她未肯定會在香港還是加拿大置業，但如果想今年在香港買過千呎豪宅，估計她已準備好幾百萬首期。
岑麗香新婚不久，老公強強都有陪同來港暫時居住。昨日香香出席恒基兆業旗下的「高爾夫‧御苑Eden Manor-健力士世界紀錄大全-締造歷史時刻」球場樓盤活動，乘機睇樓的她坦言希望今年可以築過千呎的愛巢。
招呼親戚住
香香自認愛睇樓，得知此樓盤對住高爾夫球場，而強強又愛打高爾夫球，故要睇心水盤。講到兩人愛巢，香香稱：「香港同加拿大都有留意，有啱就會行動，見到好嘅機會先會決定。（今年內買？）如果係就好啦！但每樣嘢都有timing，至緊要啱size。」問到是否想買一千呎？她笑言：「呎數未知，至緊要夠我同老公住，同埋如果親朋戚友探我哋時，可以有埋地方畀佢哋住就最好。（咁一千呎唔夠？）睇吓喺邊，因為加拿大三、四房可能二千呎，香港三、四房可能一千呎，要睇個地方同埋間格實唔實用，始終外國大部分係house，香港多數係apartment，所以要睇啱間格，同埋舒唔舒服。」如果香香想今年買樓，即差不多已準備好首期，現時香港千呎豪宅起碼要千幾萬，估計她至少已儲夠幾百萬首期。
老公幫揀衫
香香自爆短裙Look是老公親自挑選：「佢一聽到我出席呢個活動，就教我做一啲Golf嘅甫士，同埋揀衫。」問她懂不懂打高爾夫球？她稱打過練習場，遲些想在較大型的場地學習。問到可會叫強強教？她即冧笑說：「又得啫。」她又稱分開幾次去度蜜月，之前去了台灣，稍後會計劃下一次，而新年會在香港過，二月中才開工。
文：音樂組