黎明「模範前度」終認愛！
唔係靚仔就大晒！雖說小鮮肉當道，但怎能一個帥字了得，始終唔接地氣，最緊要夠真夠貼地，真係林雪呃like嘅威力分分鐘勁過林峯！出道超過三十年嘅天王黎明，個腦快過部電單車，好似至尊寶變身孫悟空咁，顯現佢無敵智慧金句王嘅真身，而且真得嚟夠4D，武功高強到根本唔使用劍，落葉飛花已經可以傷人於無形，成為堅抽的黎明！黎天王金句大家成日話難明，佢早前接受內地節目《金星秀》訪問，我Nuts哥相信大家應該聽得明佢背後嘅意思：「我黎明係深愛過舒淇！」
唔痛又點算愛過？
由當年唔提唔答，到依家激罕回應同舒淇分手原因，佢話人哋婚都結埋，唔可以再討論咁多。行近又怕驚動你，黎明唔多講，我Nuts哥睇得出，直至今日，佢對舒淇依然尊重珍惜，你快樂所以我快樂，舊愛搵到幸福，自己都戥佢開心。見到黎天王咁答，平時牙尖嘴利嘅主持金星都招架唔住，冇再追問落去！你估金星嘢小o架？金星係中國著名舞蹈家，亦都係變性人，由男兒身變為女兒身，仲嫁埋個德國人領養三個細路，唔係唔勁嘛？真係乜嘢都見過嘅金星，連最辛苦嘅變性手術、最難受嘅目光，都一一捱過，又點會怕你黎明？
雖然黎明把口話唔提唔講，但佢將「最欣賞的人」嘅光環畀咗舒淇，呢個「賜封」，盡在不言中。唔明？廿五年前，黎明首大熱經典金曲《對不起我愛你》已經唱咗：「一生裏頭，誰是我的心中最美？往日的你。」能夠公開表示最欣賞嘅係舊愛，為呢段情畫上最有風度嘅句號，真係冇乜人可以做到！黎天王簡直係「模範前度」，起碼唔似有人分完手講舊愛，竟然拋出舊鞋論話分手就好似隻鞋「銀」腳唔啱着咁出位！正如黎明話齋：「如果冇痛就唔會一齊！」背後解讀言簡意賅：「我深愛過舒淇。」唔痛又點算真正愛過？
有口痕友話黎明為咗返內地吸金，所以賣大包益街坊「消費」舒淇。以黎天王嘅巨星地位，仲需要講舊史咩？半百黎明知天命，男人五十，玩過試過食過溝過婚又結過，有乜女人未見過？只係回首過去經歷多多，先至練到今日嘅從容淡定。而佢都知做天王嘅女人唔易，想當年舒淇由台灣過嚟香港為養家而毅然一脫，但憑佢實力好快一步又一步咁上位，最慘嘅係，唔少粉絲覺得黎天王至高無上，應該搵個脫俗有仙氣嘅女神先至匹配。七年情，對於一個偶像嚟講，可以維繫咁多年仲唔係真愛？可惜一切都係timing問題，今時今日舒淇係公認嘅女神，如果舒淇依家同黎明一齊，個故事又會唔會改寫？
大覺瞓最緊要
黎明表態，舒淇一直封口唔回應，佢喺社交網站分別放咗張叫大家「早抖」、同埋自爆有白頭髮嘅相。等咗19年，等到頭髮也白，舒淇終於獲黎明承認地位，聽落好唏噓，但依家對佢嚟講，已經唔係痛處，一句「早抖」，大覺瞓最緊要。我Nuts哥聽聞舒淇曾經向白龍王問姻緣，白龍王話：「佢一早已經出現喺你身邊。」千算萬算，點會諗到所講嘅，唔係同自己拍拖七年嘅黎明，而係做咗咁多年朋友，之後升呢做埋老公嘅馮德倫！兜兜轉轉，那人卻在燈火闌珊處，王菲同謝霆鋒都翻撻啦！話o靚妹或大媽一律免問嘅黎明，會唔會最後同番舊愛兼依家獨身嘅周海媚一齊呢？呢個可能係一百萬題目。
Nuts哥