占美霍士開餐變開片打到鬥雞

現年49歲的占美上周六晚與幾名友人，一同在位於西荷里活的著名餐廳Catch用膳，他們在庭院等開餐期間，有一名男食客上前投訴他們發出的聲浪太大，有目擊者指該名男子發脾氣怒吼：「我喺紐約嚟，你唔會想惹我！」而與占美同行的喜劇演員就爆粗回應：「X你！我喺奧克蘭嚟！」目擊者指男子突然撲向占美出手捉住他，並將他拉倒在枱上，而占美亦不甘示弱反擊，出手叉頸將其壓低，期間有人拍下衝突時的片段並放上網，二人疑似同時向後跌倒，旁邊的人不停勸大家冷靜，結果雙方都因為騷擾到其他食客而被餐廳職員趕離場。

首映遲大到

據知當時除占美外，不少名人如金牌電影監製謝利畢咸馬（Jerry Bruckheimer）、男星古巴高汀（Cuba Gooding Jr.）及大導演米高比爾（Michael Bay）等都在場用膳並目擊一切。被襲前兩日，占美與女拍檔Michelle Monaghan一同出席新片《Sleepless》在洛杉磯舉行的首映，但由於要上清談節目的關係，結果占美遲一小時才到首映現場。

爆粗狂捽眼

事後占美在社交網Instagram拍片交代事件，他用毛巾捽右眼，並不停爆粗說：「X，單嘢已揚咗。我知你哋全部都聽過呢單X嘢，亦睇過一啲片段。我只係想從我嘅角度去講星期六發生咗咩事。」之後占美拎走條毛巾扮被人打到鬥雞眼，並不忘宣傳新戲笑說：「我只係玩X你哋，2017年，我哋唔想有暴力，唔想有人受傷。如果你哋想睇我打X人，13日（本周五）去睇我新戲《Sleepless》。」而他亦留言：「想澄清一下，我哋其實可唔可以相處得好？東岸同西岸！」占美被襲，但他的緋聞女友影星姬蒂賀姆絲（Katie Holmes）卻未有在社交網回應。

文：外娛組