歐詠怡歐詠寶C殺宅男

新進模特兒歐詠怡（WingWing）及堂姊歐詠寶將推出寫真月曆，兩人均有C Cup上圍及超長腿，身材索爆！擁三年Model經驗的WingWing直言為圓演藝夢捱盡苦頭，試過險碌落山，更曾被紅火蟻咬而險死，望今年能升呢！

年初雖不是寫真集「旺季」，但仍有新進模特兒推出寫真月曆，由一月開始箍實宅男心！同樣有32C上圍的模特兒歐詠怡（WingWing）及堂姊歐詠寶（Yogurt）將推出個人寫真月曆，大玩制服及床上誘惑。擁白滑超長腿的兩女，不少照片均是低炒拍攝，令美腿盡現人前！作風較疏爽的WingWing更Cosplay低胸俏女僕，騷事業線兼有趷籮甫士，其中一輯相兩姊妹更孖住拍攝，勢令Fans鼻血直流！

遇紅火蟻險喪命

WingWing指今次親自構思造型，最喜歡女僕Look，覺得性感又可愛。問到難忘事，她表示拍攝當日天氣極冷，要捱凍捱餓開工，結果翌日不支病倒！擁有三年模特兒經驗的WingWing不諱言過去為儲錢有不少辛酸經歷，望今年可憑寫真增強人氣：「好多朋友以為做Model好易搵錢，但其實付出好大，試過瞓街影相，又喺大熱天時行山，差啲中暑同跌落山崖，最誇張一次喺郊區畀紅火蟻咬到，有生命危險，好彩及時睇醫生咋！咁辛苦都係希望憑自己努力賺錢，望有安樂窩。（有咩夢想？）喜歡唱歌，舊年開始唱自己改編歌詞嘅歌，希望今年可以拍埋MV。」