王君馨過肥年捱杯麵

藝人袁偉豪（Ben）和王君馨（Grace）昨日出席「東港城‧年年有魚3D藝術展」揭幕禮，兩人發揮創意，以毛筆書寫及畫出與雞年有關的祝賀語「福有油雞（攸歸）」及「雞年興旺」，Grace烏身寫毛筆字時，露出微微「線頭」，之後又與Ben合唱劇集《城寨英雄》的片尾曲《從未知道你最好》，兩人受訪時透露首次合唱這歌，Grace笑謂緊張到震：「聽唔到我喺度震咩？可能變咗震音。」

撐展鵬咪嘴有理

兩人去年憑《城寨英雄》的角色彈起，工作大增，Ben坦承今年可以過肥年：「肥晒，大家都肥，都要嘅，辛苦咗咁多年，畀番少少廚餘我哋，等我哋有啲嘢食吓啦！」Grace就笑謂雖然賺多了錢，但這幾天仍要捱杯麵：「我都想煮麵食，但因為拍劇拍到凌晨5點，瞓得兩、三個鐘又要起身，我除咗杯麵都冇其他選擇，慘慘豬。」

王君馨俯身時輕露事業線。

袁偉豪和王君馨手拖手合唱《城寨》片尾曲。

提到曾合作拍劇的陳展鵬在《勁歌金曲頒獎典禮》上咪嘴獻唱，兩人均力撐對方「咪嘴有理」，Ben說：「有時藝人如果身體唔舒服或者太攰，咪嘴未必唔好，反而係負責任，我都知展鵬呢排拍劇好辛苦，冇休息過。」Grace就表示眾所周知展鵬是唱得之人，但因他並非專業歌手，忙於拍劇才沒時間練歌。

發老脾非壞事

展鵬近日被前亞視監製爆因發少爺脾氣，所以當年被亞視雪藏，Ben即笑謂自己都有少爺仔脾氣：「每個人有自己嘅性格，有時都要適當咁釋放情緒，最重要係唔會影響正式工作嘅進度。」Grace亦說：「有時好多嘢發生，難免會發脾氣，但大家做呢一行都會明白嘅。」

文：音樂組

攝：秦健輝