郭偉亮食30拳勁開心

音樂人郭偉亮（Eric）首次與曹星如合拍廣告，於廣告中扮Iron Man扮到出晒位的他，接受電話訪問時稱是曹星如的Fans：「之前有捧佢嘅拳賽，好欣賞佢，拍廣告時先正式有機會認識，佢個人好謙虛，私底下係一個細路，但上到台就變野獸，可以想像到佢喺打拳度真係落咗好多苦功。」他又提到拍攝一場被曹星如打臉的戲，足足硬食了二、三十拳：「佢用右拳打我左邊面，因為要拍打到我塊面唧啲肉出嚟，足足拍咗2、30個Take。」問他可擔心被打傷？他笑說：「唔係我驚，係曹星如驚，因為佢怕打親我，其實我被打仲開心，因為好少人有機會畀世界冠軍拳手打一拳，我就係為咗呢拳，特別閉關努力去苦練面部肌肉。」他又表示絕不介意被搶鏡：「大家一齊玩啦！」又讚曹星如是「香港人嘅真Hero」！