梅姨喊晒口轟特朗普趕絕

多年來獲獎無數的梅姨，曾八度贏得金球獎，今屆則憑《走音歌后》（Florence Foster Jenkins）獲第30次提名。雖然未能再奪影后，但獲頒事業成就獎，一樣咁威水！梅姨致詞時乘機批評特朗普，激動兼含淚說：「荷里活布滿外人同異族，如果你踢走晒我哋，你除咗美式足球同混合武術之外就冇嘢可以睇，而呢啲唔係藝術！但我哋係咩人？咩嘢係荷里活？佢哋只係一班來自其他地方嘅人。」她又提到妮妲莉寶文（Natalie Portman）與賴恩雷諾士（Ryan Reynolds）等藝人的外國背景，反問他們的出世紙在甚麼地方，明寸特朗普早前要求現任美國總統奧巴馬（Barack Obama）證明自己是在美國出世。

辱殘障記者：年度最「突出」

梅姨又嘲諷特朗普於造勢大會上模仿殘障記者Serge Kovaleski說話是「年度突出演出」：「我當時睇到後好傷心！佢唔係電影中發生，而係現實生活上，一個公眾人物做壞榜樣去羞辱人，到最後會影響所有人，因為大家有大條道理有樣學樣！」最後，她引述剛離世的好友「莉亞公主」嘉莉菲莎（Carrie Fisher）一句話：「將你破碎嘅心，轉化成藝術。」大會又播出嘉莉及其影星媽媽德琵雷諾（Debbie Reynolds）的作品片段，向兩人作致敬。

至於主持Jimmy Fallon亦向特朗普開火，開場白中借電視劇《權力遊戲》（Game of Thrones）惡名昭彰的角色King Joffrey來形容特朗普！

隔空反擊：佢支持希拉妮

事後，特朗普回應眾星批評：「我畀班民主派電影人提起冇乜出奇。我從來冇羞辱人，我只係想話個記者因為改變口風而變得緊張。其他人一路話我想羞辱個記者嘅殘障，梅麗史翠普同其他人好似識睇穿個思想咁，我根本唔係。記住，梅麗史翠普介紹過希拉妮出場，好多呢啲人都支持希拉妮。」

文：外娛組