菊梓喬經濟拮据靠妹支撐廿蚊兩餐
獨立歌手菊梓喬（Hana）在「新城勁爆」及「十大中文金曲」頒獎禮中橫掃新人獎後，昨日簽約星夢娛樂成為旗下歌手，雖然泊得好碼頭，還未到收成期的Hana仍要為追夢而捱窮，幸好有當文職的妹妹全力支持，為她交租及應付基本生活開支，令她可以繼續做歌手。
Hana昨日在電話中表示入行半年都試過零收入：「老實講依家我經濟都唔係咁好。（咁點生活？）我有幾千蚊生活費都夠，會買十蚊肉、十蚊菜，一次過煮晒分兩餐，咁就捱到一日，夠飽又健康，平時我盡量唔出街就唔使使錢，衫爛咗咪補番再着。（有乜娛樂？）落公園行，望吓咁靚嘅天，心情就好好，或者去書局打書釘，又係免費。（病咗點算？）唔使睇醫生，我會用洋葱或蒜頭蒸水飲，有殺菌作用，瞓多啲同做運動就會好番，食太多西藥反而減低身體免疫力！」
譚嘉儀時裝店抓衫着
要妹妹擔起頭家的Hana直認有內疚感，還跟妹妹約法三章：「畀一年時間我，如果真係唔成功，我就會做番正職。」她不諱言「朝不保夕」的日子承受的壓力會令人瘋狂：「呢啲日子，我都覺得自己癲咗，聽到啲人講啲睇唔起我嘅說話，真係好難受，不過音樂係我嘅一切，會將難聽嘅說話化作動力，令自己更努力。」
而同在今年得兩個獎的歌手譚嘉儀昨日在電話中表示：「我都係搵幾千蚊個月，平時咪慳啲使囉，我試過入去啲時裝店自我介紹，問人可唔可以贊助啲衫畀我，多數都成功，因為化妝品冇贊助，就返無綫用公家化妝品，又可以慳一筆！」