何雁詩捱出頭攬父母喪喊
在娛樂圈發展，無論歌手或演員都希望名利雙收，但不少人成名前都經歷一段辛酸的日子。入行八年的何雁詩，在近日的頒獎禮上成績不俗，前晚她撰文自爆追夢期間，曾經歷過長時間零收入，多年來冇錢畀家用之餘，更要父母提供金錢上的協助，令她一度攬住父母爆喊！
歌手何雁詩去年憑演唱劇集插曲《愛需要勇氣》成功得到關注，更在四個樂壇頒獎禮上奪得三個獎項，成績不錯。原來平日以「開心果」形象示人的她，其實經歷過一段不為人知的辛酸史！
前晚何雁詩在社交網站有感而發，發文透露：「『拍劇真係好辛苦，上星期爸爸抱着我，媽媽坐在我身旁，由我大哭，好久沒有放聲大哭，因為我是堅強的女孩子。」並提到入行八年試過零收入，覺得愧對父母：「這幾年經歷過沒有收入的日子（而且月份很多），家人從不需要我賺大錢，但一直家人供書教學，入行八年，我覺得一個成熟的人也至少希望自給自足，不用家人擔心吧？若然我再沒有穩定收入，恐怕也不能再做音樂，因為實在不能讓家人擔心一輩子。」堅持不放棄的何雁詩去年終於捱出頭，甫文一出，網民熱烈回應，留言支持。
之後她更主動聯絡本報記者，表示其母看到本報為她剪輯的片段後，相當感動！何雁詩補充說：「我阿爸今年66歲，仲要好辛苦咁工作，但我呢個做女嘅咩都幫唔到手。喺零收入嘅日子，好在有家人無條件支持，咁耐以嚟我都冇畀過家用，但佢哋唔會怨，阿媽每個月仲會主動問我夠唔夠錢使，幾多錢都肯畀我。有次我賺到萬幾蚊，即刻請阿媽去福岡旅行，筆錢清晒，希望下次可以請埋阿爸去旅行！」
陳瀅有義氣代交租
拍攝劇集《四個女仔三個BAR》時，何雁詩與陳瀅、陳凱琳（Grace）等結成好友，低潮時期亦得到一班好姊妹的幫助，何雁詩說：「2015年我同陳瀅夾份租屋住一年，曾經試過冇錢交租，當時每人一個月要畀幾千蚊，我有幾個月遲咗畀，陳瀅好好，冇追過我，我有鬆動錢即刻畀番佢，依家我都返咗屋企住！」又指Grace知道她沒有太多收入置裝出活動，就轉介一些服裝品牌贊助商給她。何雁詩出身小康之家卻自爆零收入，問可怕被指無病呻吟？她說：「錢唔係重點，只係想分享自己冇放棄做歌手，終於做出一啲成績。」
許廷鏗家人叫轉行
Grace受訪時，坦言不知何雁詩零收入一事，因她向來正能量爆燈，很少在朋友面前訴苦：「好開心佢呢兩年有好成績，希望佢可以繼續保持唱歌同拍劇嘅熱情，我一定會支持佢！」與何雁詩同屬「巨聲幫」成員的歌手許廷鏗，同樣出身小康之家，他對於何雁詩的遭遇感同身受，因他也試過零收入：「眼見身邊好多大學同學都係專業人士，收入十幾萬，家人試過有幾次開聲叫我做番牙醫，令我都諗過放棄做歌手，但佢哋終於見到我有團火，近年都轉變咗。」
文：音樂組