賭王何鴻燊三房千金何超蓮緋聞男友一籮籮，包括台灣型男柯震東、藝人方力申、富二代霍啟山等，最新鮮熱辣的是英皇集團主席楊受成孻仔楊政龍（Alex）。有指二人從小認識，而男方一直對她甚有好感，得知超蓮喜歡組合Twins，更特意安排明星飯局，邀請蔡卓妍（阿Sa）、張敬軒及吳千語等出席湊熱鬧。超蓮昨日在ig上載一張電腦照，留言稱專心工作：「人生實在有太多事情比活在別人的耳語中重要！帶着正念工作，勿忘初心，不令對自己有期望的人失望！大家也是喔！」似乎想用文字「否認」緋聞。
據超蓮身邊朋友透露：「佢哋由細玩到大，超蓮一直視對方為哥哥同妹妹，根本就冇嘢，唔想人誤會。」有份飯局的阿Sa指他倆是從小玩到大的老友，更指超蓮稱呼對方做「契哥」：「當日我哋成大班朋友食飯啫，唔係咩追求。」至於張敬軒昨晚出席頒獎禮時回應：「唔係，全部人都知超蓮係Alex契妹，只係傳媒唔清楚先有呢個誤會。」
記者就此致電Alex哥哥楊其龍，他笑說：「我要向佢八吓先，真係唔知。（識唔識超蓮？）識得，不過就唔熟。（支持佢追超蓮？）佢咁大個仔自己識揀(口架)啦！（教細佬追女秘技？）我咁渣點教呀？」