劉穎鏇文武雙全抓劇拍

藝人邵珮詩、岑杏賢（Jennifer）、港姐亞軍劉穎鏇及季軍陳雅思等昨日在鑽石山出席明珠台《魔鬼神探之魔鬼變神探》記者會。眾女以「天使與魔鬼」的造型示人，Veronica扭腰擺甫士晒曲線，Jennifer露腰上陣。兩女受訪時透露將合作拍攝無綫全新處境劇，過往被觀眾批評聲線過尖的Veronica「知衰」，笑言新劇中會盡量壓低聲線，力保觀眾緣：「我依家病咗，把聲低啲，可能多人鍾意啲，拍處境劇又可以日日磨練。（依家做戲會好注意聲線？）係，今次角色成熟的，把聲要沉啲，呢排不停開Party把聲都拆咗。（再想辦法整粗把聲？）咁咪好啲囉！」

岑杏賢冇仔埋身

同樣演過處境劇的Jennifer表示拍新劇感覺開心，似足一家人齊齊返工，收入亦更穩定。問農曆新年會否在家擺桃花陣？Jennifer直言會買桃花催旺事業：「每年都買，想桃花旺啲。（分手後特別需要？）唔好咁講，想要觀眾緣。（新一年搵新男友？）順其自然，依家冇人追，唔覺得有。」

劉穎鏇（左起）、黎振燁、岑杏賢、陳雅思、丁子朗及邵珮詩化身魔鬼與天使。

岑杏賢（左）與邵珮詩有份演無綫新處境劇。

三個月進修演技

同場應屆港姐亞軍Tiffany晒腿亮相，被問會否拍劇？她表示未有，但透露正修讀為期三個月的無綫進修班，勤練演技及武術。問到能否應付演戲及武打場面？Tiffany直言樣樣都學，為拍劇做好準備：「我OK，樣樣學啲，依家上咗一個月堂，希望之後有劇拍。」談到有否遇上「魔鬼教師」？她說：「前輩同老師都好好人，唔會鬧人，會畀意見我去改進。」

文：影視組