藝人黃心穎、黃智雯及C君等昨日為無綫新劇《雜警奇兵》拜神，心穎笑指其角色「忽忽哋」，又自爆與C君做戲經常「焗蟹」忍唔住笑：「劇中我好迷戀佢，成日讚佢，但發現佢都幾抵讚！」又笑言要寒背去遷就對方的身高：「坐直個人會高過佢！我想取代陸永，同C君出去搵銀！」
該劇的拍攝時間橫跨聖誕、新年及情人節，黃智雯表示連生日也要在拍攝中度過，問男友可有投訴？她坦言二人好耐冇見，因男友要公幹，問會否叫男友郵寄生日禮物？她說：「呢啲要自動波，仲要叫？」
