健身中心冇錢交租 袁偉豪照搵教練做Gym
「牙佬」袁偉豪的健身教練Alan所屬的健身中心近日傳出欠薪，袁偉豪昨日接受訪問表示，對上一次到中心已是兩星期前的事：「依家忙緊拍劇，成日唔喺香港，所以冇去操。據我所知，Alan係其中一個老闆，佢哋嘅CEO一直唔喺香港，失咗蹤，得Alan一個喺Gym度撐住，佢都好辛苦。聽講佢老闆呢兩個月都冇畀錢佢交租、出糧，而Alan自己冇人工，所以咩都唔敢搞，好多同事一齊齋等。」
袁偉豪揚言會力撐Alan，繼續跟隨他做健身：「佢搞好手頭上嘅嘢會搵過個地方，規模可能細啲，但我哋會繼續搵佢訓練。」至於Alan則感謝學生支持，問到健身中心是否清盤？他說：「因為CEO冇出糧又失蹤，可能會面臨清盤危機，依家交咗畀學生處理。」他否認是健身中心董事，但未有回答是否投資者之一，但他承諾會繼續訓練藝人及學生。