朱盈盈醉夜蒲險被抽水

聖誕將至，前中國小姐香港區冠軍朱盈盈打扮成索爆聖誕女郎，大晒三吋事業線，性感又可愛。她品嘗日本菜預祝佳節，其中一道聖誕丼以魚生鋪成聖誕樹模樣，超有特色。盈盈笑言每年聖誕都會狂吃，難得食極唔肥，令人羨慕。

單身的盈盈直言恨拍拖，但怕逼怕嘈，不會夜蒲獵仔。她憶述有拖拍的日子，都會跟當時的男友度過：「我鍾意過二人世界，會自己煮燭光晚餐同朱古力。（送過最爆嘅禮物係咩？）有一年送性感內衣畀另一半，最終當然係自己着，佢見到好鍾意。我覺得好多禮物周街都買到，但最特別嘅禮物係自己同埋心意。」

盈盈曾跟好友外出喝酒慶佳節，靚女出巡自然被仔圍，不少「鹹濕仔」趁盈盈醉醺醺竟打算「檢屍」抽水，幸每次都有朋友及時護花。盈盈奉勸各位女士要小心：「呢啲時候男仔會特別熱心，唔知佢哋居心係點，所以姊妹們去邊都要同信得過嘅朋友一齊，亦唔好亂咁飲人哋啲嘢。」

場地：弘CHIRASHI

鳴謝：Barry＠Oneness

文：立影

攝：劉斌