黃建東屈碌架床創作不認輸

現年35歲的Derek憑惡搞日本歌曲《PEN-PINEAPPLE-APPLE-PEN》（PPAP）而熱爆網絡，一夜之間由冇人識，變成炙手可熱的網絡紅人，其實初入行的Derek，試過零收入：「參選完港男之後，幾個月冇工作，又唔敢自己接Job，試過成個月冇收入，惟有黐屋企，朋友好好，會搵我食飯，但我唔想黐餐，想夾番錢，但朋友話唔使，佢哋令我好感動。」不過他坦承也有難堪的時候：「對我嚟講，比較難受、有挑戰性嘅時候係同舊同學聚埋一齊，佢哋會話我就嚟買第二間屋，另一個又話換樓，一個想買跑車，我嗰吓覺得，死啦，我仲同緊屋企人住，自己有少少耿耿於懷，後來諗通咗就唔會唔開心。」

屋邨出身

相隔五年，Derek靠自己賺了人氣，但收入始終不高，仍要跟家人同住，還跟細佬同瞓碌架床，熱愛創作的他經常要屈在下格床思考，他坦言連給家用也有困難：「可能嗰個月工作唔多，或者有時娛樂圈唔係每一個工作都有收入，好多幫忙嘅活動，但屋企人好好，好支持我，佢哋都好諒解，嗰個月真係畀唔到好多家用，佢哋又唔會逼我，又唔會畀說話我聽，我爹哋媽咪係好難得（口架）。因為我係慳家仔，我有1,000收入，就會儲800，自己使200！」Derek更視吳業坤為偶像，原因是對方同樣捱足五年，證明屋邨出身也有出頭天：「佢對我好大啟發，佢入行五年，由做主持開始，佢入行時好想唱歌，但未有機會做歌手，後來一路自己拍片儲粉絲，儲觀眾儲歌，對我好大鼓勵！」他透露吳業坤曾私下勉勵他：「佢見到我肥咗，拍吓我個肚，同我講：『阿東，你幾時減肥呀？不如咁啦，每日畀自己跑二十分鐘，跑一個月。』佢驚我低潮期自暴自棄，對我好大啟發。」

放大圖片	曾獲演藝獎的黃建東，果然充滿演藝細胞。

永不放棄

雖然演藝事業並不穩定，但Derek從未想過放棄，相反任何工作機會也不放過。對於突然爆紅，問他可有吐氣揚眉的感覺？Derek謙虛表示：「我訪問過藝人，明白娛樂圈今日OK，聽日可能會跌，所以我一啲都唔覺得自己爆紅，呢個係一個起步，雖然已經35歲，但係觀眾開始認識黃建東係邊個。」他亦曾說過在台慶愈企愈後，因而感到氣餒，算是人生最迷茫的時期：「當時好想做一啲嘢，但冇機會，娛樂圈每日有新人出，側邊好多新過我嘅人行得前咗，見自己墮後咗，都好擔心，因為最大原因係我年紀唔細，呢個對我嚟講，好大擔憂，好多新人得廿歲，啲人話喺TVB浸10年8年，可能會畀人認識，但人哋廿歲，浸10年8年都係28、30，咁我30先入去，浸10年8年已經40幾歲，自己成日有個計時鐘咁。」

髮型：Deep Yu@Beijing Hair Culture

化妝：Alfred@Seven sense

服裝：HALFBEAT

文：專案組