江美儀刻薄顧紀筠囝囝 ：佢設定畀我恰！
近日是非纏身的江美儀被指主持無綫節目時說話刻薄，又責罵顧紀筠兒子陳浚霆，去年演出舞台劇時更不尊重監製及拉隊投訴無綫高層曾勵珍，她昨日逐一回應，解釋節目中「鬧人」是角色設定所致，一於撐到底！
藝人江美儀、米雪、Kellyjackie與姜皓文等昨日出席公開活動，近日是非一籮籮的美儀頓成焦點，但見她處之泰然，還逐一回應所有事件。對於主持無綫節目《街市遊樂團》時被指聲大夾惡，經常責罵顧紀筠兒子陳浚霆（Andrew），美儀表示是節目風格：「角色設定Andrew做下靶位畀我哋恰，觀眾唔係由第一集開始睇就唔知係咁！（你話剝蝦係自甘墮落？）我唔係話佢哋，係講我哋幾個大食懶！如果係話舖頭就唔會咁開心畀地方我哋拍啦！」雖然被不停攻擊，但美儀未有介懷，更死撐代表節目有人睇：「我真係冇嘢，證明我戲好！我哋幾個好錫Andrew，依家個個都識佢！」
得罪人多：係自己問題
談到去年演出舞台劇《嬉春酒店》無禮對待監製而被易角，美儀坦言不知內情：「可能套戲出要做宣傳啦！（同監製有錢銀爭拗？）人哋畀晒錢我，仲收多咗四場錢添！（鬧過監製？）我講嘢冇尾音，好倔會畀人誤會，係要改！其實單立文同陳彥行都冇做啦，可能平時得罪人多，啲人針對我！」
美儀透露早前參加禪修活動後有所領悟，認為很多時是自己問題，更主動提起前無綫監製關永忠：「當時係我情緒令人誤會同唔開心，要同大家道歉！第一次做女主角，但有好多唔開心事發生，我想講我冇帶隊投訴。珍姐（曾勵珍）早前傳短訊畀我，叫我唔好為無中生有嘅事唔開心，叫我返開公司搵佢。（受委屈？）算啦！都發生咗！惟有之後做好啲，唔好畀人誤會。」她又指與關永忠一直有聯絡：「佢話大家仲係朋友，叫我唔好放喺心上。」
陳浚霆：掛住佢把聲！
對於獲網友「出頭」，Andrew接受電話訪問時笑說：「畀佢鬧到興起，呢幾個星期冇畀佢鬧，仲Message佢話好掛住佢把聲，佢反問我係咪被虐狂！其實佢係無辜，都係為節目效果。」另一主持滕麗名亦力撐拍檔，解釋被指罵Andrew的字句「你走啦！」是主持圍內的「私語」。
文：影視組